Një grup prej 22 veprimtarësh atdhetarë shqiptarë në SHBA dhe në Kanada kanë vendosur të futen në grevë urie para OKB-së në Nju Jork.

Ajo do të zhvillohet në të njëjtin vend ku u organizua greva e famshme e urisë e një grupi bashkatdhetarësh shqiptarë kundër dhunës e terrorit shtetëror të Milloshevicit, që pat një jehonë të jashtëzakonshme jo vetëm në SHBA, por në mbarë Botën.


Midis grevistëve bëjnë pjesë ish-kandidatë për deputetë, të afërm të viktimave të dhunës elektorale të 28 qershorit 2009, avokatë, etj.


Motivi i grevës është solidariteti me bashkatdhetarët tanë në Shqipëri për të mbrojtur votën e lirë, si një nga liritë dhe të drejtat themelore të njeriut dhe të demokracisë, kundër vjedhjes dhe manipulimit të votave nga partia në pushtet.


Greva fillon të premten me datën 7 maj në mëngjes. Orari u ndryshua për shkak të përkeqësimit të gjendjes së grevistëve të urisë në Tiranë, që u rrezikohet jo vetëm shëndeti, por edhe jeta. Në të do të marrin pjesë edhe 5 gra e vajza shqiptare.


Me qindra bashkatdhetarë në SHBA dhe Kanada kanë shprehur gatishmërinë për t'iu bashkuar grevës, por për arsye hapësire, numri i pjesëmarrësve është kufizuar në vetëm 22 veta, njoftojnë organizatorët.


Greva nuk bëhet në emër të asnjë partie politike apo lideri të veçantë, por vetëm në emër të Shqipërisë, në emër të lirisë e demokracisë, sipas standardeve amerikane e perëndimore.
" Vota ime është jeta ime!" , "Otrantoja është shqiptare, qeveria shitëse e saj është antishqiptare", "Vjedhësit e votave- komunistët e fundit në Europë!" , "Nuk ka vend për Ahmexhinaxhad në zemër të Europës!", "Teheran - Tiranë - Vjedhës votash dhe tiranë!" etj., do të jenë disa nga parullat që do të alternohen gjatë grevës pa afat.


Të premten do të njiheni me organizatorët dhe emrat e pjesëmarrësve në këtë grevë, që janë nga të gjitha trevat shqiptare: Shqipëri, Kosovë, Maqedoni, Mal i Zi, Çamëri, Preshevë - Medvegje - Bujanovc.

Gazeta Shekulli