________
* Ajo ishte ulur pas një trëndafili të madh te mbushur plot gonxhe te bardha, i cili ja shtonte me shume bukurine e saj.Ishte midis miqsh dhe po qeshte me zë. Ai ishte duke kaluar aty afër dhe i tërhoqi vëmendjen pikërisht e qeshura e çiltër dhe e sinqertë e saj dhe mbasi kishte bërë disa hapa, për të qënë në rregull edhe me normat e etikës, kishte kthyer shpejt kokën. Ai çast, ai moment, ishte edhe shpërthimi.
* Ajo po e ndiqte me sy dhe vështrimet e tyre u takuan. Iu duk se natyra pushoi së marri frymë. Ndjeu në fund të gjoksit një si shtërngim dhe e preu padashur të qeshurën.Bulëza djerse i mbuluan ballin dhe ndjeu një të përzjeë të lehtë në stomak. Ai kishte qëndruar dhe po e shihte i çuditur atë ndryshim, aq të shpejtë të asaj fytyre të bukur. Kishte shumë dëshirë të afrohej dhe të ofronte ndihmën e tij, por ndruhej se nuk do ta pranonin. E kush ishte ai që të kishte këtë të drejtë? Sa vajza të bukura ka rruga…