Forumi Horizont (http://www.forumihorizont.com/index.php3)
- Grupi A1 (http://www.forumihorizont.com/forumdisplay.php3?forumid=231)
-- KS. Vllaznia (http://www.forumihorizont.com/showthread.php3?threadid=1935)

Kuqeblutë do t'i kërkojnë FSHF-së të analizojë vendimet tendencioze, sipas tyre, të gjyqtarit Duraj
Vllaznia: Na mundi gjyqtari, jo Lushnja
Vllaznia, pas disa rezultateve pozitive, është frenuar në Berat nga lushnjarët e Agim Canajt. Përkundër rezultatit 1-2, ajo që ka mbetur si shije e hidhur nga ai 90-minutësh është gjykimi i memaliotit Genci Duraj. Të gjithë futbollistë kuqeblu, trajnerë dhe drejtues klubi, ashtu si pas ndeshjes, edhe gjatë ditës së djeshme, e kanë kontestuar gjykimin e kësaj ndeshje, i cili, sipas tyre, ka ndikuar në rezultatin përfundimtar të saj. "Mendimi ynë është se gjykimi i ndeshjes ka qenë tendencioz. Na janë mohuar dy 11-metërsha flagrantë, ndërkohë që ka pasur edhe shumë raste të ndërprerjeve me dashje të ndeshjes, për të ulur tempin e lojës sonë. Po t'u shtosh këtyre fakteve edhe disa goditje standarde të akorduara kundër skuadrës sonë, e kupton menjëherë që gjyqtari Duraj na ka dëmtuar shumë në këtë ndeshje. Për pasojë, Vllaznia doli e humbur nga kjo ndeshje." Ky ka qenë reagimi i presidentit të Vllaznisë, Agron Çela, një ditë pas humbjes me Lushnjën. Më tej, trajneri kuqeblu, Dervish Haxhiosmanoviç, ka qenë kritik ndaj Federatës, për sa u përket "bluzave të zeza". "Me të tilla gjykime, niveli i këtij kampionati veçse zbehet. Këtë nuk e them ngaqë Vllaznia humbi, por sepse rolin kryesor në arritjen e fitores së lushnjarëve e luajti gjyqtari. Vendimet e tij ishin krejtësisht të njëanshme, prandaj jemi shumë të revoltuar," - ka thënë malazezi. Ndërkohë, vetë futbollistët mendojnë se "gjëma" e gjykimit ka ardhur ngaqë dikujt mund t'i jetë dhimbsur Lushnja, nisur nga kriza që po kalonte. Për rrjedhojë, ndokush ka dashur ta ndihmojë kësaj here me gjyqtarët. "Por, duke luajtur në kurriz të Vllaznisë, duke i shkaktuar asaj humbjen, e cila, për fat të keq, erdhi në momentin më të mirë të saj, ata kanë bërë një gabim të madh," - shprehen të irrituar disa nga titullarët e Vllaznisë. Në fakt, deri në këtë ndeshje, shkodranët nuk kishin shfaqur as pretendimin më të vogël, për sa u takon gjykimeve. Madje financuesit e këtij ekipi, Çela & Co, shpeshherë janë dukur të çuditur nga fjalët që kanë dëgjuar për gjyqtarët, akuzat dhe "shijen" jo të mirë që ata lënë te shumë skuadra. Kjo ngaqë nuk e kishin provuar në kurriz të tyre se ç'do të thotë të humbasësh ndeshjen prej tyre. Për këtë qëllim, bëhet e ditur se Vllaznia do të protestojë zyrtarisht pranë FSHF-së, për të gjithë ato gjëra që konsiderohen të qëllimshme nga gjyqtari i kësaj ndeshjeje në dëm të tyre. Bashkë me protestën e tyre, ata pritet të paraqesin para drejtuesve të institucionit qendror të futbollit edhe kasetën filmike të ndeshjes Lushnja-Vllaznia, në të cilën vërtetohet më së miri "akuza" e tyre për gjyqtarin Duraj. Duke u marrë me veten e tyre, drejtuesit e kuqebluve nuk janë të mendimit se kanë gabuar. Loja e zhvilluar ndaj lushnjarëve konsiderohet përgjithësisht e mirë, çka do të thotë se ata nuk pritet të bëjnë ndonjë mbledhje-analizë për të gjetur shkaqet që çuan në humbjen e Beratit. Ata tashmë e kanë gjetur atë: bëhet fjalë për gjykimin e ndeshjes.