Forumi Horizont (http://www.forumihorizont.com/index.php3)
- Konfliktet botërore (http://www.forumihorizont.com/forumdisplay.php3?forumid=160)
-- Procesi i Paqes ne Lindjen e Mesme (http://www.forumihorizont.com/showthread.php3?threadid=1481)

Izraeli njofton lirimin e 100 militantëve palestinezë

Qeveria e Izraelit e miratoi propozimin e kryeministrit Ariel Sharon për lirimin nga burgu të 100 ekstremistëve të tjerë palestinezë, një hap që duket se do të çojë përpara planin e paqes të mbështetur nga SHBA-të. Kabineti votoi dje 14 me 9 pro lirimit të militantëve palestinezë. Ky hap ndërmeret dy ditë para vizitës në SHBA të kryeministrit Ariel Sharon ku ai do të takohet të martën me Presidentin Bush. Zyrtarë izraelitë kanë rënë dakord, dje, të kalojnë dy qytete të Bregut Perëndimor nën kontrollin palestinez dhe të heqin tri postblloqe ushtarake në zonat palestineze. Ata thanë se hollësitë e këtyre veprimeve do të diskutohen me zyrtarë palestinezë të sigurimit gjatë ditëve të ardhshme. Ndërkohë, dje trupat izraelite kanë lëvizur nga disa pika kontrolli afër Hebronit dhe Ramallahut, duke hapur rrugën për në 100 fshatra palestineze për herë të parë, që kur nisi revolta në shtator të vitit 2000. Presidenti Bush kërkon të bëhet përparim në kuadrin e planit të paqes midis Izraelit dhe palestinezëve. Takimi i tij ditën e martë me Sharonin bëhet pak ditë pas bisedimeve që ai zhvilloi të premten në Shtëpinë e Bardhë me kryeministrin palestinez, Mahmud Abaz. Pas takimit, Presidenti Bush shprehu mbështetje të fortë për Abaz-in. Ai kritikoi edhe ndërtimin e një muri izraelit sigurie, që ndan Izraelin nga Bregu Perëndimor. Në një konferencë të përbashkët shtypi me Abas, Presidenti Bush tha se muri është një problem, të cilin ai e ka diskutuar me kryeministrin Sharon.