Forumi Horizont (http://www.forumihorizont.com/index.php3)
- Shqiperia Demokratike (http://www.forumihorizont.com/forumdisplay.php3?forumid=213)
-- Shtypi : Shenjtërimi i Nënë Terezës - Gonxhe Bojaxhiu (http://www.forumihorizont.com/showthread.php3?threadid=2641)

Vatikan - Sot Lumturimi i Nene Terezes

Me gjak jam shqiptare, me shtetësi jam indiane dhe me zemër i përkas Jezu Krishtit". Ky është prologu i biografisë së Nënë Terezës, një "autograf" i saj që përgënjeshtron gjithë të thënat mbi origjinën maqedonase. Mbi 550 mijë njerëz janë sot dëshmitarë të lumturimit të Saj. Vatikani ka çelur dyert për besimtarë nga e gjithë bota, të varfër e pasanikë, pushtetarë, politikanë, personalitete të artit, kulturës… shqiptarja e Kalkutës është Nëna e të gjithëve. Të sëmurët e shëruar që kanë shtrënguar hajmalinë e dhënë nga dora e saj, që kanë prekur kryqin e dhuruar, e kanë mbajtur pranë vetes portretin e saj nuk kanë dyshuar asnjëherë se Ajo është shenjt.

Mrekullia
Monika Besra, gruaja indiane nga Bengali, ka jetuar mrekullinë e nënë Terezës. Në '98-ën, kur ajo qe në prag të vdekjes për shkak të tumorit në vezore, u deshën vizitat e njerëzishme që e mbushën me dashuri, fjalët e lutjet dhe portreti i gruas së vogël me zemër të madhe, besimi e mundi shkencën. Gruaja u shërua. Vatikani e njohu si mrekulli të Nënë Terezës shërimin, tre vjet pas vdekjes u shënuan procedurat para për shenjtërimin e saj. Vendimi që habiti shumë njerëz, për shkak të thyerjes së rregullave të fesë (duhet të kalojnë të paktën 5 vjet që të nisë shenjtërimi) u mor nga Papa Gjon Pali II, mediat e komentuan si rrjedhojë e adhurimit dhe afeksionit ndaj Nënë Terezës. Një tjetër i sëmurë me leuçemi, Mark Çuni, australian, është shprehur pa pritur vendimin e Selisë së Shenjtë për Nënë Terezën. "Ajo është një shenjt". Mjekët e kishin paralajmëruar, kishte vetëm dy javë jetë. Me kryqin e vogël, dhënë nga Nënë Tereza, jetoi dhe 7 vjet pas destinit të kobshëm. Nënë Tereza ndërkohë vazhdonte endjen bamirëse në botë, vdiq në '97 në moshën 87 vjeçare.

Ceremonia
Itinerari është mjaft i ngjeshur. Siç shprehet ambasadori ynë në Vatikan, Zef Bushati, ritet do fillojnë në 10.00 me meshën e fjalën e Papës për të përfunduar orët e vona me spektaklin e fishekzjarreve. Në koncertin simfonik-akademik nga 2.000 të pranishëm, 1500 janë shqiptarë. Drejt Vatikanit kanë udhëtuar bashkë Berisha, Moisiu e Topalli, në çarterin që i ka shpënë matanë brigjeve, diskutimet për politikën e zhvillimet e nxehta të këtyre ditëve kanë qenë të tepërta dje, po udhëtonin të ishin dëshmitarë për shenjtërimit e njeriut të paqes. I pranishëm është dhe kryetari i Kuvendit Popullor, Servet Pëllumbi. Kuvendi shqiptar përfaqësohet gjithashtu edhe nga nënkryetarja Jozefina Topalli. I pamundur për të qenë atje i ka çuar një mesazh Papa Gjon Palit të II. Mes dhjetëra homologëve në botë, personalitetet tona janë sigurisht krenarë, privilegjin ua jep Nëna Jonë.


"Maratona e Popujve" mbledh të rinjtë e botës në Tiranë

TIRANE - Mijëra vetë nga e gjithë bota do të përshkojnë sot rrugët e Tiranës në një maratonë të organizuar për nder të Nënë Terezës. "Maratona e Popujve" zhvillohet pikërisht në ditën e lumturimit të "shenjtores së të varfërve". Ajo është organizuar nga Ministria e Kulturës, Rinisë dhe Sporteve, Bashkia e Tiranës, Federata Shqiptare e Atletikës në bashkëpunim me rajonin e Lacios, Puljas dhe Komunën e Parmës. Pjesëmarrësit në këtë vrapim masiv do të nisen nga sheshi "Nënë Tereza" dhe do të përshkojnë të gjithë bulevardin "Dëshmorët e Kombit". Më shumë se 200 vrapues nga shumë shtete të botës do të marrin pjesë në maratonën prej 21 kilometrash dhe 500 të rinj në garën prej shtatë kilometrash. Ndërkohë, mbi 1500 fëmijë do të zhvillojnë një garë të shkurtër simbolike në kuadër të aktivitetit madhor. Aktiviteti do të trasmetohet direkt nga televizioni shqiptar Klan si dhe televizioni italian Rai. Po sot, një grup i organizuar alpinistësh do të ngjiten në malin e Korabit dhe do të vendosin simbolisht statujën e Nënë Terezës atje.

Pjesëmarrës edhe 60 shqiptarë nga Amerika