Forumi Horizont (http://www.forumihorizont.com/index.php3)
- Grupi A1 (http://www.forumihorizont.com/forumdisplay.php3?forumid=231)
-- FK Teuta (http://www.forumihorizont.com/showthread.php3?threadid=349)

Trajneri i Teutës u kërkon të tijve vlerësim maksimal për kundërshtarin e radhës
Lika: Flamurtari,si të gjithë të tjerët

Trajneri i Teutës, Hasan Lika, e konsideron ndeshjen e radhës me Flamurtarin sfidë që skuadra e tij duhet ta fitojë patjetër. Sidoqoftë, kryeqytetasi i stolit të "djemve të detit" qëndron me këmbët në tokë, duke dashur të mos shkatojë ndonjë ndjenjë euforie te futbollistët e tij. Prandaj dhe shprehet: "Duhet të tregohemi të kujdesshëm, nëse duam të marrin 3 pikët, sepse përballë do të kemi një Flamurtar që, pavarësisht nga problemet e ndryshme financiare, duhet vlerësuar maksimalisht. Pra, skuadra vlonjate do të vlerësohet njësoj si të gjithë kundërshtarët e tjerë." Sipas trajnerit të Teutës, Flamurtari është një skuadër me tradita në futbollin shqiptar dhe, kur mobilizohet, nxjerr ndeshje të mira. Pra, sipas Likës, ai është një kundërshtar i rrezikshëm për çdo skuadër. Në këtë sens, trajneri i durrsakëve thekson se gjatë gjithë javës përgatitore po punohet me intensitet të lartë për këtë ndeshje, e cila do të zhvillohet të shtunën në "Niko Dovana". Natyrisht, në këtë tendosje të skuadrës durrsake ndikojnë shumë faktorë, mes të cilëve, më kryesorët janë objektivat për të mos lëshuar kreun dhe zbavitja e publikut durrsak, që pret jo vetëm rezultatin pozitiv, por edhe lojë bindëse. Për sa u përket dy mungesave të Teutës në sfidën me Flamurtarin (mbrojtësit Xhai dhe Zëre), trajneri Lika shprehet: "Sigurisht, bëhet fjalë për dy mungesa të rëndësishme të Teutës në këtë ndeshje. Sidoqoftë, edhe pse dihen vlerat e Xhait e të Zëres, i kemi marrë masat t'i zëvendësojmë ata me futbollistë të tjerë të stolit. Fatmirësisht, do të rikthehet Tetova, i cili, për arsye dëmtimi, mungoi në ndeshjen me Tiranën."
Sikurse dihet, në ndeshjen paraardhëse me Tiranën, Teuta fitoi me rezultatin 3-1, duke iu bashkangjitur Partizanit në krye. Kësisoj, çdo hap fals për skuadrën durrsake do të ishte i pafalshëm. Një rreziku të tillë kërkon t'i ruhet trajneri Lika, i cili, edhe pse e ka vlerësuar jashtëzakonisht fitoren me Tiranën, vëmendjen kryesore e ka përqendruar te ndeshja e radhës me Flamurtarin. Në çdo seancë stërvitore, trajneri i Teutës u ka kërkuar të tijve që të mos ushqejnë asnjëlloj iluzioni nënvlerësimi për kundërshtarin, sepse kjo do të ishte fatale. Sipas Likës, të gjitha skuadrat e Grupit A1 janë të denja për t'i futur shkopinj nën rrota njëra-tjetrës, prandaj duhen vlerësuar njëlloj deri në fund. "Flamurtari është një skuadër e tillë, në gjirin e të cilit, pavarësisht largimeve të shumta, ka futbollistë cilësorë, të cilët mund të të nxjerrin probleme," - gjykon Lika. Gjithsesi, trajneri i Teutës, duke folur për objektivat në përballjen me Flamurtarin, shprehet: "Pa diskutim, do të kërkojmë me çdo kusht fitoren, për të ruajtur ritmin e rezultateve pozitive dhe kryesimin në tabelën e klasifikimit." Në fund, trajneri Lika nuk ka pranuar të bëjë komente rreth formacionit të mundshëm të Teutës dhe mënyrës së lojës në ndeshjen me Flamurtarin. Në seancat stërvitore, me përjashtim të Xhait dhe Zëres, që do të mungojnë në ndeshjen e radhës, të gjithë po stërviten fort për të zënë një vend në formacionin bazë. E vetmja surprizë mund të jetë aktivizimi i sulmuesit Daniel Xhafa.