Forumi Horizont (http://www.forumihorizont.com/index.php3)
- Diskutime te ngjarjeve nga Shqiperia (http://www.forumihorizont.com/forumdisplay.php3?forumid=307)
-- Lajmet e fundit... (http://www.forumihorizont.com/showthread.php3?threadid=15860)

Media në Shkup: Fatos Nano biznes hotelesh në Maqedoni

Friday, 22 January 2010 20:17 . .Media në Maqedoni pohon se ish-kryeministri shqiptar Fatos Nano po planifikon të zhvillojë biznes në Shkup. Sipas citimeve mediatike, Fatos Nano, ish-kryetar i Partisë Socialiste në Shqipëri, ka zhvilluar së fundi negociata të drejtpërdrejta në Maqedoni për blerjen e një hoteli në qendër të Shkupit.
“Pas largimit nga politika, siç mëson ALSAT, Nano intensivisht po bisedon me një pjesë të pronarëve të deritashëm të hoteleve në Ohër, që humbën për shkak të kërkesave të pashlyera ndaj bankave për kreditë. Njerëzit e afërt me ish-kryeministrin shqiptar konfirmuan sot për ALSAT në Ohër se Nano së shpejti, pas përfundimit të gjitha procedurave të nevojshme, do të bëhet pronar i një hoteli që gjendet afër qendrës. Po ashtu, ai është i interesuar të bëhet edhe bashkëpronar i një hoteli tjetër”, citojnë mediat në Maqedoni dhe në Kosovë.
Sipas tyre, pronarët e hoteleve refuzuan të komentojnë publikisht, por nuk mohuan faktin se janë në negociata me Nanon i cili tashmë një është pronar edhe i dy banesave në kompleksin elitar të banesave "Akua Blu" afër fshatit Peshtan.
Doktori Sasho Vasilevski është mik i ish-kryeministrit Fatos Nano. Ai thotë se ish-kryeministri shqiptar e adhuron Ohrin.
”Në kontaktet e mia me të, bëhet fjalë për një personalitet shumë karizmatik. E di se është i dashuruar me qytetin tonë dhe do të isha i lumtur që njerëz të tillë të investojnë në Ohër, ish-kryeministra dhe diplomatë, me çka do të rritej pozicioni i qytetit tonë. Rreth blerjes së kapaciteteve të caktuara hoteliere nuk mund të pohoj, ndonëse edhe unë kam dëgjuar për këtë. Ai e do Ohrin, e respekton traditën dhe konsideron se në Ohër ekzistojnë gjasa reale për investime në turizëm. Prania e tij e shpeshtë këtu në Ohër po tregon edhe interesimin e tij për të investuar këtu” ka thënë Vasilevski.
Mediat citojnë faktin se bashkëshortja e ish-kryeministrit Fatos Nano, Xhoana është pronare e biznesit familjar në Shqipëri, Greqi dhe në disa vende evropiane, ndërsa familja Nano ka edhe një agjenci turistike “Xhoi Travel”.

( LAJMI FUNDIT )