Roi
Drift in and out....
Regjistruar: 22/04/2009
Vendbanimi: Shkretetire
Mesazhe: 786
|
Enciklopedia maqedonase shtrembëroi faktet për historinë e shqiptarëve; ky është një ngacmim që nxit tensionet dhe e vështirëson bashkëjetesën mes shqiptarëve dhe maqedonasve”.
Kryetari i Akademisë shqiptare të Shkencave, Gudar Beqiraj reagoi dje ndaj promovimit të një botimi enciklopedik nga Akademia maqedonase e Shkencave, që fyen historinë shqiptare.
Ai tha se të gjitha pretendimet maqedonase hidhen poshtë nga faktet e dokumentuara në enciklopeditë e studimet e historianëve dhe akademikëve shqiptarë. Në një intervistë për “Gazetën Shqiptare”, kryetari i Akademisë, Beqiraj, sqaron se Akademia maqedonase nuk ka kontaktuar asnjëherë me homologen shqiptare për të përballur të dhënat apo për t’i verifikuar ato. Sipas tij, pohime të tilla aspak serioze nxisin konflikte të panevojshme ndëretnike.
Enciklopedia e promovuar nga Akademia e Shkencave në Maqedoni ka shkaktuar debate dhe polemika mes shqiptarëve e maqedonasve në vendin fqinj për shkak të informacione të pasakta lidhur me origjinën dhe historinë shqiptare. Cili është reagimi juaj për këtë?
Jam informuar për këtë ngjarje nga shtypi dhe mediat tona, që kanë pasqyruar faktin se vetë kryetari i Akademisë maqedonase të Shkencave ka promovuar enciklopedinë që shtrembëron faktet për historinë e shqiptarëve. Ne nuk kishim asnjë njoftim zyrtar për këtë, sepse natyrisht kjo nuk është në dorën tonë, por në atë të akademisë maqedonase. Por, kam dëgjuar edhe reagimet e historianëve dhe studiuesve shqiptarë në Maqedoni kundër kësaj enciklopedie. Është për të ardhur keq që historia është shtrembëruar në këtë mënyrë. Duke mos qenë i fushës së historisë apo dokumentacionit, por duke qenë anëtar i hershëm i Akademisë së Shkencave dhe duke e ditur se ka botime shumë të mira lidhur me historinë shqiptare, fjalorë enciklopedikë të shkruar nga emra të njohur si Aleks Buda, Neritan Ceka, Myzafer Korkuti, më vjen shumë keq që ato nuk janë marrë parasysh nga historianët dhe studiuesit maqedonas. Botimi i parë daton në vitin 1985 dhe më pas ka vijuar puna për rifreskimin e tyre. Studimet e hollësishme për etnogjenezën, i profesor Myzafer Korkutit, ai për ilirët i Neritan Cekës apo ai për pellazgët i Aleks Budës, kanë gjithçka të dokumentuar dhe janë pikërisht ato që e hedhin poshtë këtë “histori” të sajuar nga enciklopedia maqedonase.
Jeni kontaktuar nga Akademia e Shkencave e Maqedonisë për të folur lidhur me pretendimet që u përmblodhën në këtë enciklopedi?
Nuk kemi pasur asnjë lloj bashkëpunimi, nuk jemi kontaktuar prej tyre. Është e pakuptueshme sesi kur bëhet fjalë për aktivitete të tilla, që përfshijnë studimet shkencore, historinë, nuk ka asnjë tentativë për të komunikuar për përqasjen e fakteve, për të dhënë të gjitha anët e historisë. Unë besoj te fakti se të gjithë synojmë të shkojmë drejt integrimit në Bashkimin Europian, drejt një bashkëjetese në rajon, kufijtë po shkrihen dhe njerëzit po largojnë barrierat e po komunikojnë më shumë. Pikërisht për këtë, a nuk mund të gjendet një mundësi që gjithçka të studiohet në tërësi, që t’i referohesh shkencëtarëve të kësaj fushe dhe të këtij kombi? Nuk ka një moment të caktuar që një historian të bëjë oponencë lidhur me faktet e pretenduara të një historiani tjetër. Kjo enciklopedi, që për më tepër është mbështetur nga shteti maqedonas, është e njëanshme dhe mendimi i historianëve, studiuesve dhe arkeologëve shqiptarë duhej marrë patjetër parasysh.
Historianët maqedonas këmbëngulin se dy studiues shqiptarë kanë vendosur firmën e tyre në këtë enciklopedi. Ju vetë keni të dhëna nga studiuesit shqiptarë në Maqedoni për pjesëmarrje në këtë botim?
Nuk ka pasur asnjë lloj bashkëpunimi me historianët dhe studiuesit shqiptarë në Maqedoni. I referohem profesor Myzafer Korkutit, i cili ka komunikuar me kolegët në këtë vend. Ata e kanë kundërshtuar dhe kritikuar një botim të tillë. Thuhet se dy shqiptarë kanë marrë pjesë në përgatitjen e enciklopedisë, por se ata nuk janë akademikë. Profesor Luan Starova, të cilit iu ofrua bashkëpunimi, është tërhequr.
Cilat janë faktet që kundërshtojnë pretendimet maqedonase për origjinën e shqiptarëve dhe praninë e tyre në këto troje që në kohë të hershme?
Faktet janë kokëforta. Ato janë të dokumentuara dhe mund të verifikohen. Po sjell vetëm një shembull; me ardhjen e turqve në vitin 1400 në Ballkan, ata regjistruan të gjitha pronat me qëllim mbledhjen e taksave, dhe ndaj të gjithë emrat e banorëve janë regjistruar në vendet ku ata jetonin. Emërtimet e këtyre vendeve janë shqiptare, gjithçka është e dokumentuar në atë që quhet Defteri i Stambollit, një dokument ky që mund të verifikohet lehtë. Pretendimet maqedonase për mbërritjen e shqiptarëve në shekullin e tetëmbëdhjetë janë të pabaza, pasi dokumenti daton shumë kohë më parë, rreth viteve 1400. Pretendimet për Nënë Terezën dhe Skënderbeun janë gjithashtu të pabazuara. Një akademie shkencash nuk i lejohet të mos konsultojë faktet dhe të nxjerrë publikime të tilla që bien ndesh me historinë.
Do të kërkoni ndalimin e kësaj enciklopedie që bie ndesh me faktet ku bazohet historia shqiptare?
Mendoj se mënyra më e mirë është që t’i përgjigjemi kësaj me fakte, të paraqesim pavërtetësinë e pretendimeve maqedonase. Ne nuk mund t’i kërkojmë Akademisë Maqedonase të Shkencave të tërheqë botimin, dhe besoj se edhe paneli i Akademisë Botërore nuk mund të detyrojë në tërheqjen e botimeve. Por, detyrimi ynë është me ekspertët e fushës, akademikët, historianët dhe studiuesit t’i përgjigjemi këtij botimi, duke e rrëzuar atë.
Por, ç’hapa do të ndiqni konkretisht për të sqaruar opinionin dhe për të kundërshtuar informatat e gabuara të enciklopedisë maqedonase?
Ne kemi kërkuar kopjen origjinale të kësaj enciklopedie, që sapo është promovuar në Maqedoni dhe që ende nuk ka ardhur këtu. Do të shqyrtojmë gjithçka përmban ajo për shqiptarët dhe historinë e tyre dhe me faktet e pranuara ndërkombëtarisht do të hedhim poshtë historinë e pavërtetë të treguar nga ky botim.
Media ka njoftuar se materiali për shqiptarët i përfshirë në enciklopedi është marrë nga Akademia serbe e Shkencave. Cili është mendimi juaj për këtë?
Nuk kam informacione të sakta për këtë. Por, nuk do të më vinte aspak çudi. Akademia e Shkencave në Serbi ka qenë gjithnjë e fuqishme, me ndikim nga qeveria dhe gjithnjë e gatshme të shpërndajë informacionet dhe qëndrimin e saj.
Cili do të jetë ndikimi i kësaj enciklopedia në bashkëjetesën mes shqiptarëve dhe maqedonasve në vendin fqinj dhe ç’tensione mund të krijojë ajo në të gjithë hapësirën shqiptare në rajon?
Kjo enciklopedi është në vetvete një lloj ngacmimi, një provokim ndaj shqiptarëve të Maqedonisë, por edhe të gjithë shqiptarëve në Ballkan. Nuk e kuptoj ku qëndron vlera e publikimit të një informacioni të tillë provokues, ndërkohë që po flasim gjithnjë e më shumë për bashkëjetesë paqësore, bashkëpunim. Nuk e di pse kjo hidhet në treg sot, në një kohë Maqedonia synon dhe kërkon me këmbëngulje nisjen e negociatave për anëtarësimin në BE, ndërsa një gjë e tillë “nuk çon ujë në këtë rrugë”. Ky është një ngacmim për të gjithë shqiptaret atje, që bashkëjetojnë me maqedonasit, bashkëqeverisin me ta. Maqedonasit duhet ta kuptojnë se një nxitje e tillë nuk ka asnjë vlerë, e përkeqëson situatën atje dhe në rajon.
Gazeta Shqiptare
__________________
Si sta come d'autunno sugli alberi le foglie !
Denonco këtë mesazh tek moderatorët | IP: e regjistruar
|
lezhjani-82
19 Shtator 2009 05:34
hahaha edhe aty faji i ne verioreve geg eshte pse ata duken aq lame ne nje skene boterore
Forumi Horizont > Media dhe Politika > Politika Shqiptare > Ceshtja kosovare dhe me gjere > Maqedonia ofendon Shqiptaret ne Enciklopedine e saj.
