Regjistruar: 05/02/2003
Vendbanimi: Rio
Mesazhe: 2547

Mesfushori peqinas i kërkon skuadrës që të luajë me shpirt, si në ndeshjen e mesjavës për kupë.

Shkumbini e shikon veten të kualifikuar në turin e katërt të kupës dhe kjo përbën një sukses jo të vogël për të. Megjithatë, synimet e skuadrës peqinase janë në kampionat, ku kërkohet mbijetesa në Grupin A1. Sidoqoftë, në takimin e së mërkurës me Albpetrolin bëri përshtypje një fakt. Fjala është për formën mjaft të mirë të mesfushorit peqinas Klodian Dervishi, i cili qe autori i 2 golave për vendësit. Me golat e shënuar, shtatlarti peqinas rikthehet si goleador si në kampionatet e kaluara, kur shënonte vazhdimisht me kokë. Gëzimi i tij në këtë ditë ishte i madh, sepse të mërkurën mbushi 26 vjeç dhe, siç u shpreh edhe vetë, nuk kishte dhuratë më të mirë për të në ditën e ditëlindjes. "Rëndësi ka fakti që u kualifikuam, duke e përmbysur rezultatin 0-2, të fiksuar në takimin e Vlorës. U desh koha shtesë për t'ia arritur kësaj, edhe pse mundësitë i patëm që gjithçka ta mbyllnim në kohën e rregullt," - pohon Dervishi, pasi ka marrë edhe urimet e shokëve për ditëlindjen dhe për golat e shënuar. Stoperi i Shkumbinit, Klodian Dervishi, në fazën e parë të këtij kampionati u aktivizua me sukses te Dinamoja. I detyruar nga kushtet familjare, ai u kthye përsëri te Shkumbini, duke zënë një vend në formacionin bazë bardhekaltër. Kualifikimi në kupë, sipas Dervishit, i vlen shumë Shkumbinit nga ana morale, aq më tepër që e pret një ndeshje "për jetë a vdekje" në kampionat. Flamurtari konsiderohet një kundërshtar i vështirë për mesfushorin peqinas, por jo i pakalueshëm. Sipas Klodian Dervishit, paraqitja e mirë e bërë në mesjavë nga Shkumbini duhet të ketë të njëjtin rezultat edhe nesër, në ballafaqimin me vlonjatët e Latif Gjondedës.

__________________
Lo scopo della nostra vita è di servire la Forza che ci ha creati,e dalla cui misericordia o approvazione dipende il nostro stesso respiro,servendo con lealtÃ_ le Sue creature.Questo significa amore,che dovrebbe sostituire l'odio che si vede ovunque.

Denonco këtë mesazh tek moderatorët | IP: e regjistruar

Regjistruar: 05/02/2003
Vendbanimi: Rio
Mesazhe: 2547

Shkumbini, sot miqësore me Dinamon

Shkumbini është skuadra e vetme e Grupit A1 që nuk ka president, prandaj e ka vuajtur më shumë se të gjithë mungesën e anës financiare. Kjo reflektohet edhe në rezultatet e tij në dy fazat e para të kampionatit. Megjithatë, ajo që duhet theksuar është se ekipi bardhekaltër ka ditur të dalë mbi vështirësitë financiare, gjë që u duk veçanërisht në fazën e dytë. Kjo tregon se mundësitë që Shkumbini të mbijetojë ekzistojnë, sepse është një popull i tërë sportdashës që në çastet më të vështira di t'u dalë për zot këtyre djemve dhe t'i mbështesë fuqimisht. Sikurse dihet, Shkumbini po zhvillon këto ditë fazën përgatitore dhe po përgatitet për gjysmën e dytë të kampionatit. Nga drejtuesit e ekipit kërkohen përforcime me futbollistë të tjerë të nevojshëm për ta përballuar si duhet kampionatin, që në këtë periudhë vështirësohet edhe më shumë. Për këtë po bëhen përpjekje për të gjetur rrugët dhe mjetet e nevojshme financiare. Ashtu si gjithmonë, rruga më e frytshme mbetet mbështetja nga sportdashësit, të cilët nuk janë kursyer asnjëherë në raste të tilla. Për këtë, sot pasdite është menduar të organizohet një takim me njerëzit e biznesit dhe sportdashës, në të cilin pritet të ndërmerren iniciativa konkrete në ndihmë të ekipit, që ai të mbijetojë në Grupin A1 në këtë periudhë të vështirë. Iniciativën për këtë e ka marrë një grup sportdashësish, që në bashkëpunim me kryetarin e bashkisë, Skënder Hasa, do të organizojnë takimin e sotëm. Takimi në fjalë është lënë për sot, në orën 14.00, por, me sa duket, do të shtyhet për më vonë, sepse përkon me orarin e ndeshjes miqësore që Shkumbini do të zhvillojë me Dinamon. Miqësorja mes këtyre dy ekipeve do të luhet në Peqin dhe jo në Tiranë, sikurse ishte planifikuar më parë.

__________________
Lo scopo della nostra vita è di servire la Forza che ci ha creati,e dalla cui misericordia o approvazione dipende il nostro stesso respiro,servendo con lealtÃ_ le Sue creature.Questo significa amore,che dovrebbe sostituire l'odio che si vede ovunque.

Denonco këtë mesazh tek moderatorët | IP: e regjistruar

Regjistruar: 05/02/2003
Vendbanimi: Rio
Mesazhe: 2547

Dashamirësit e skuadrës peqinase kanë dhuruar nga 20 mijë lekë për secilin futbollist bardhekaltër.

Fitorja e fundit me Dinamon i dha mundësi Shkumbinit të ngjitej një shkallë më lart në renditje, duke këmbyer vendet me Besën, që tashmë shoqëron Flamurtarin e fundit. Veç marrjes së tripikëshit, aq të nevojshëm në këto momente, fitorja e fundit ua ka mbushur xhepat futbollistëve bardhekalëtr. Siç dihet, Shkumbini është i vetëm ekip i Grupit A1 pa president, gjë që është shoqëruar me vështirë të shumta financiare. Por futbolli në Peqin ka mbijetuar falë dashamirësve të këtij sporti në këtë qytet. Këta të fundit, vazhdimisht i janë gjendur pranë ekipit, duke sakrifikuar edhe nga të ardhurat e tyre. Dy prej tyre, Miri dhe Dashi, u premtuan futbollistëve shpërblim në rast rezultati pozitiv ndaj Dinamos. Pas fitores, pa u mbushur ende 24 orë, ky premtim bëhet realitet. Në takimin e parë pas fitores me Dinamon, secili futbollist mori zarfin me 20 mijë lekë shpërblim. Më pas, të gjithë së bashku ishin të detyruar të bëheshin pjesëtarë të kokteilit të organizuar spontanisht për ta. Organizator ishte Adriatik Gripshi, pronar i një lokali në qendër të qytetit. Mbrojtësi tiranas, Tafaj, i cili ka veshur fanellën bardhekaltër në këtë kampionat, tepër i prekur, nuk gjen fjalët e duhura për të shprehur mirënjohjen dhe respektin për këta njerëz me shpirt të madh, që sakrifikojnë dhe bëjnë kaq shumë për ekipin e tyre. Në fund të këtyre ceremonive, Tafaj do të shprehej për "Sportin shqiptar". "Që ditën e parë që kam ardhur te Shkumbini, e kam ndier respektin e të gjithëve për futbollin në Peqin dhe për futbollistët në veçanti. Sot jam tepër i emocionuar dhe nuk gjej fjalët e duhura për të përshkruar atë që ndiej në shpirt. E kisha dëgjuar, por sot u binda plotësisht se futbolli në Peqin qëndron mbi gjithçka, prandaj do të mbijetojë në Grupin A1. Të gjithë janë të gatshëm të sakrifikojnë për këtë sport në Peqin."

__________________
Lo scopo della nostra vita è di servire la Forza che ci ha creati,e dalla cui misericordia o approvazione dipende il nostro stesso respiro,servendo con lealtÃ_ le Sue creature.Questo significa amore,che dovrebbe sostituire l'odio che si vede ovunque.

Denonco këtë mesazh tek moderatorët | IP: e regjistruar

Regjistruar: 05/02/2003
Vendbanimi: Rio
Mesazhe: 2547

Bardhekaltrit fitojnë 3-2 në miqësoren ndaj të kuqve kryeqytetas.
Shkumbini - Partizani 3-2
Shkumbini: Kotorri, Tafaj, Magani, Muça, Bylykbashi, K. Dervishi, Nexha, R. Dervishi, Merxha, Rizvanolli, Ivanaj.
Partizani: Nallbani, Imeraj, Brashini, Alcani, Çeka, Rosha, Ballço, Allmuça, Ahmataj, Abilio, Bejzade.
Shënues: R. Dervishi (2), Rizvanolli, Bakaj, Abilio.

Shkumbini ka zhvilluar dje miqësoren e radhës me Partizanin. Pra, ajo e djeshmja ishte e treta, pas Besëlidhjes dhe Skënderbeut, në këto ditë ndërprerjeje të kampionatit. Trajneri Bici, në fillim të kësaj ndeshjeje, hodhi në fushë Kotorrin, Tafajn, Maganin, Muçën, Bylykbashin, K. Dervishin, Nexhën, R. Dervishin, Merxhën, Rizvanollin dhe Ivanajn. Binte në sy aktivizimi i K. Dervishit dhe Bylykbashit, që vinin pas dëmtimit të pësuar në ndeshjen e fundit në kampionat. Trajneri Mema i Partizanit, që kishte disa mungesa, hodhi në fushë Nallbanin, Imerajn, Brashinin, Alcanin, Çekën, Roshën, Ballçon, Allmuçën, Ahmatajn, Abilion dhe Bejzaden. Edhe në këtë miqësore, përballë të kuqve, bardhekaltrit u treguan të saktë, sepse fituan me rezultatin e ngushtë 3?2. Ky 90-minutësh pati dy tablo. Pjesa e parë foli për vendësit, të cilët shënuan dy gola me të njëjtin autor, R. Dervishin. Në këtë pjesë loje, bardhekaltrit humbën edhe disa raste të tjera të pastra për shënim me anë të Rizvanollit dhe Ivanajt. Meritë të veçantë në këto raste pati edhe portieri mik, Nallbani. Në pjesën e dytë, miqtë e përmirësuan ndjeshëm lojën. Trajnerët bënë zëvendësimet e duhura dhe nga këto përfiton Partizani, i cili kërkon ta gjejë sa më shpejt rrugën e golit. Ekipi mik arrin të organizohet më mirë në mesfushë. Sulmi me Abilion dhe Bejzaden bëhet më aktiv. Në minutën e 53-të, miqtë gjejnë rrugën e rrjetës me Bakajn. Shkumbini, i ripërtërirë në formacion me mjaft futbollistë të rinj, i kushton rëndësi mbrojtjes, duke e mbështetur ngacmimin e portës kundërshtare me anë të kundërsulmit. Në minutën e 73-të, vendësit tregohen të saktë, duke shënuar golin e tretë me anë të Rizvanollit. Miqtë, duke mos u pajtuar me këtë rezultat, ngulmojnë përsëri, derisa shënojnë golin e dytë, pa shpëtuar dot nga humbja 3?2. Pavarësisht rezultatit, që në miqësore nuk ka shumë vlerë, të dy trajnerët mbetën të kënaqur nga ajo që demonstruan ekipet e tyre. "Ky takim më shërben mjaft për të krijuar një ide të plotë për disa futbollistë të rinj që u provuan sot. Ata i kryen më mirë se disa titullarë detyrat e tyre," - u shpreh trajneri i të kuqve, Mema. Këtë mendim shprehu pak a shumë edhe Bici, i suksesshëm në fazën e tretë të kampionatit e në miqësoret e zhvilluara këto ditë. "Jemi akoma në fazën e përgatitjes dhe të harmonizimit të veprimeve me futbollistët e afruar së fundi në skuadër. Miqësoret po na shërbejnë mjaft në këtë drejtim," - pohoi Bici.

__________________
Lo scopo della nostra vita è di servire la Forza che ci ha creati,e dalla cui misericordia o approvazione dipende il nostro stesso respiro,servendo con lealtÃ_ le Sue creature.Questo significa amore,che dovrebbe sostituire l'odio che si vede ovunque.

Denonco këtë mesazh tek moderatorët | IP: e regjistruar

Regjistruar: 05/02/2003
Vendbanimi: Rio
Mesazhe: 2547

Pas ndeshjes zhgënjyese në mesjavë me Tiranën, bardhekaltrit kanë bindur në sfidën me Flamurtarin.

Shkumbini, në javën e 23- të të kampionatit, ka qenë i vetmi ekip i Grupit A1 që ka fituar jashtë fushës së vet, duke siguruar tri pikë mjaft të vlefshme. Fitorja 2-1 e arritur në stadiumin e Flamurtarit, përballë ekipit vendës, pati më tepër vlera, sepse u mor ndaj një rivali të drejtpërdrejtë për mbijetesë. Shkumbini, me këtë fitore, bëri një hap përpara në renditje, duke përfituar edhe nga humbja e Besës me Lushnjën dhe barazimi i Elbasanit me Partizanit. Takimi i fundit ishte një provë karakteri për bardhekaltrit, të cilët vinin pas një humbjeje të pësuar në mesjavë në Rrogozhinë, nga Tirana. Shkumbini krijoi në Vlorë, ndaj Flamurtarit vendës, i cili ishte totalisht i përgjumur. Goli nuk do të vononte për Shkumbinin dhe kjo e nxiti më shumë dëshirën për të shënuar përsëri në pjesën e parë. Për trajnerin Bici, e para ishte një pjesë e mirë, ku futbollistët e tij i zbatuan me korrektësi detyrat. "E patëm vlerësuar si duhet kundërshtarin, sepse për ne kishte rëndësi të madhe kjo ndeshje. Donim të përfitonim nga gjendja që po kalon Flamurtari dhe ia arritëm kësaj. Kësisoj, u ngjitëm diçka më lart edhe në tabelën e klasifikimit. Patëm disa mungesa, por futbollistët zëvendësues e justifikuan mjaft mirë besimin e dhënë," - thotë Bici. Në pjesën e dytë, sipas Bicit, kundërshtari e përmirësoi dukshëm lojën, duke e vënë në vështirësi Shkumbinin, i ndihmuar edhe nga era e fortë në favor. "Vendësit luajtën më mirë në pjesën e dytë dhe na vunë në vështirësi disa herë, ngaqë patën aleat edhe erën e fortë. Nuk arritën të bëjnë më shumë, sepse ekipi ynë luajti i mirorganizuar. Fituam me meritë dhe bëmë kështu një lloj autokritike pas asaj paraqitjeje zhgënjyese në mesjavë me Tiranën," - e përfundon komentin Bici, duke përgëzuar futbollistët e tij për lojën e zhvilluar dhe për fitoren e arritur.

__________________
Lo scopo della nostra vita è di servire la Forza che ci ha creati,e dalla cui misericordia o approvazione dipende il nostro stesso respiro,servendo con lealtÃ_ le Sue creature.Questo significa amore,che dovrebbe sostituire l'odio che si vede ovunque.

Denonco këtë mesazh tek moderatorët | IP: e regjistruar

Regjistruar: 05/02/2003
Vendbanimi: Rio
Mesazhe: 2547

Mbrojtësi 19-vjeçar i Shkumbinit shprehet optimist për qëndrimin e ekipit të tij në Grupin A1.

Futbollistët e Shkumbinit vazhdojnë përgatitjet për ndeshjen e radhës në kampionat me Besën. Tripikëshi i marrë ndaj Flamurtarit e ka ngritur moralin në ekipin bardhekaltër, duke shtuar kësisoj edhe "oreksin" për ta pasuar atë me një tjetër fitore. Sipas mbrojtësit të ri të Shkumbinit, Kelment Xhyra, ekipi i tij e ka grupin e futbollistëve dhe përgatitjen e duhur për të qëndruar në Grupin A1. Në takimin e fundit Xhyra u aktivizua që në minutën e parë nga trajneri Bici dhe ishte një nga lojtarët më të mirë në fushë. Duke folur për fitoren me Flamurtarin, mbrojtësi shtatlartë i Shkumbinit mendon: "Nuk diskutohet që ajo me Flamurtarin ishte një fitore e merituar dhe e arritur në kohën e duhur. Kjo fitore ka jo vetëm vlera 3-pikëshe, por edhe morale. Triumfuam ndaj një rivali të drejtpërdrejtë në fundin e tabelës dhe kjo tregon se Shkumbini meriton të ngjitet më lart."
Në ballafaqimin me skuadrën vlonjate Shkumbini pati 4 mungesa të rëndësishme në formacion, Nexha, K.Dervishi, Xhaja dhe Bylykbashi. Megjithatë, kjo nuk u ndie aq shumë, sepse zëvendësuesit e justifikuan plotësisht besimin e trajnerit Bici. "Për mua është më e lehtë kur luaj jashtë, sesa në Peqin. Kjo nuk është diçka e mirë, por me kalimin e kohës besoj se do të më kalojë. Kam fatin dhe privilegjin që luaj përkrah kapitenit Magani, që për mua është model i futbollistit. Me të në fushë, çdo gjë bëhet më e lehtë. Ai vazhdimisht më ka qëndruar pranë dhe më ka inkurajuar, edhe kur nuk jam paraqitur si duhet," - shton më tej Xhyra, shtatlarti i mbrojtjes peqinase, i ardhur nga ekipi i të rinvje.
Për Kelment Xhyrën, Shkumbini ka hyrë në fazën e tij më të rëndësishme. "Ekipi ynë duhet të tregohet i saktë përballë çdo kundërshtari, sidomos me rivalët e drejtpërdrejtë për t'iu larguar fundit të tabelës. Duke filluar nga ndeshja e së shtunës me Besën, Shkumbini duhet të tregojë karakter dhe shpirt të lartë gare, elementë këto tepër të domosdoshëm për të fituar një ndeshje futbolli dhe për t'iu larguar zonës së ftohtë," - gjykon në fund Xhyra.

__________________
Lo scopo della nostra vita è di servire la Forza che ci ha creati,e dalla cui misericordia o approvazione dipende il nostro stesso respiro,servendo con lealtÃ_ le Sue creature.Questo significa amore,che dovrebbe sostituire l'odio che si vede ovunque.

Denonco këtë mesazh tek moderatorët | IP: e regjistruar

Regjistruar: 05/02/2003
Vendbanimi: Rio
Mesazhe: 2547

Mbrojtësi peqinas u tërheq vëmendjen kolegëve, duke u kujtuar se vlonjatët kanë marrë pikë në Peqin.


Shkumbini kërkon ta lërë pas dhe ta harrojë humbjen e fundit me Tiranën, duke u përqendruar plotësisht për takimin e radhës me Flamurtarin në Peqin. Nga ajo humbje në "Selman Stërmasi" ata janë përpjekur të nxjerrin mësimet e duhura. Stoperi i Shkumbinit, Klodian Dervishi, është nga lojtarët bazë të formacionit bardhekaltër, që në çdo ndeshje dallohet për sedrën që e karakterizon, duke qenë vazhdimisht shembull për ekipin. Në takimin me Tiranën, Dervishi ishte autori i golit të parë për ekipin e tij, që e realizoi nga pika e 11-metërshit, por që më pas u detyrua të lërë fushën e lojës për shkak të një dëmtimi në gju. Ai tashmë është drejt përmirësimit dhe kërkon të jetë në fushë për takimin me Flamurtarin. "Në fakt, dëmtimi nuk ka kaluar plotësisht, por shpresoj që të shtunën të jem i gatshëm dhe në dispozicion të trajnerit Haxhia. E kam shumë të vështirë të qëndroj në stol në këto momente kur ekipi ka nevojë për kontributin tim,"- pohon me sinqeritet për "Sportin shqiptar" stoperi i Shkumbinit, kur e pyet për dëmtimin në gju. Ai kërkon që të jetë në takimin me Flamurtarin edhe për t'i nxitur më shumë futbollistët e ekipit të tij që të mos nënvlerësohet në asnjë mënyrë kundërshtari. Ai kujton se në ndeshjet e fundit vlonjatët po bëjnë një figurë mjaft të mirë, duke vënë në pozitë të vështirë çdo kundërshtar. "Takimi me Flamurtarin është mjaft i rëndësishëm dhe duhet vlerësuar njësoj si kundërshtarët e tjerë. Të mos mendojmë se kundërshtari s'ka motive për të luajtur fort në Peqin dhe ne ta marrim shtruar. Flamurtari përbëhet nga lojtarë të rinj, që luajnë bukur dhe me dëshirë. Kjo është parë mirë në takimet që ka zhvilluar javët e fundit,"- kujton Dervishi, si për t'u tërhequr vëmendjen të tijve që të japin më të mirën në fushë dhe jo duke e menduar të lehtë e të fituar përpara kohe takimin. Nga ana tjetër, mbrojtësi 26?vjeçar Dervishi përmend edhe traditën e mirë që ka krijuar Flamurtari në vite në takimet e zhvilluara në Peqin, kur edhe pse nuk ka pasur pretendime është larguar me pikë. "Tradita nuk është përcaktuese, por ajo është një tregues tjetër që Flamurtari kërkon përqendrimin e duhur. Edhe në kampionatet e kaluara, vlonjatët kanë ardhur në fakt pa pretendime, por në fund janë larguar me pikë, duke luajtur pa paragjykime dhe duke e merituar atë,"- përfundon Dervishi, i cili i kujton skuadrës të luajë pa menduar që kundërshtari do të luajë pa motive, duke mos bërë rezistencën e duhur në Peqin, ngaqë tashmë e ka prerë biletën për në A2.

__________________
Lo scopo della nostra vita è di servire la Forza che ci ha creati,e dalla cui misericordia o approvazione dipende il nostro stesso respiro,servendo con lealtÃ_ le Sue creature.Questo significa amore,che dovrebbe sostituire l'odio che si vede ovunque.

Denonco këtë mesazh tek moderatorët | IP: e regjistruar