Regjistruar: 02/08/2003
Vendbanimi: ^^__^^
Mesazhe: 1610

Bashkangjitje: enkel_alikaj.jpg
Ky file është shkarkuar 17 herë.

Mesfushori i dëmtuar i Dinamos, Enkel Alikaj, i është nënshtruar një operacioni të suksesshëm në Austri, në gjurin e djathtë. Lojtari i kombëtares Shpresa ka pasur këputje të ligamente të kryqëzuar të gjurit, që nga ndeshja e Kupës UEFA, kundër Lokerenit të Belgjikës, në gusht. Lojtari ka udhëtuar drejt Austrisë të dielën dhe pardje i është nënshtruar operacionit. Gjithçka ka përfunduar me sukses, por lojtari i Dinamos do të qëndrojë në Austri e pakta edhe dy javë të tjera, për terapinë dhe rehabilitimin. Në qëndrimin e tij në Austri, Alikaj është ndihmuar nga futbollisti Auron Miloti, i cili luan me Vërgl. Ish-futbollisti i Vllaznisë dhe Tiranës ka siguruar akomodimin e lojtarit të Dinamos, si dhe ndihmesë për vizitat e shpeshta në spitalin ku është kryer operacioni. Megjithëse operacioni ka përfunduar me sukses, Alikaj duhet t’i thotë lamtumirë futbollit në sezonin aktual. Sipas të gjitha gjasave, mesfushori i talentuar do të rikthehet në fushë vetëm në prag të sezonit të ardhshëm. Sezonin e kaluar, Alikaj u huazua te Apolonia e Fierit, ku ishte një ndër lojtarët më të mirë, për t’u rikthyer sërish te Dinamo. Ndërkohë, blutë e Sulejman Demollarit, ndesër paradite në orën dhjetë do të zhvillojnë një ndeshje miqësore me Besën e Faruk Sejdinit. Dinamo nuk do të luajë të mërkurën në kampionat, pasi kundërshtari i radhëz, Vllaznia, ka kërkuar shtyrjen e takimit, për shkak të udhëtimit drejt Amerikës.

__________________
s...._d._m... says: for nothing that happened this time...!!

Denonco këtë mesazh tek moderatorët | IP: e regjistruar

Regjistruar: 05/02/2003
Vendbanimi: Rio
Mesazhe: 2547

Trajneri i bluve pret sot reagimin e skuadrës së tij pas lojës së dobët që zhvilloi në derbin me Partizanin.

Blutë do të luajnë sot, në orën 13.30, takimin e kthimit të turit të tretë të Kupës së Shqipërisë. Ky takim do të luhet në fushën stërvitore të kompleksit "Dinamo". Në ndeshjen e para dy javëve, Dinamoja e ka mundur Laçin me rezultatin 2-1, me gola të shënuar nga Ilir Qorri e Edmond Dalipi me 11-metërsh. Pavarësisht nga rezultati komod i ndeshjes së parë, trajneri Demollari ka vendosur t'i grumbullojë të gjithë lojtarët për përballjen e sotme me Laçin. Ai u ka kërkuar të tijve të japin maksimumin për këtë ndeshje, për të siguruar kualifikimin në turin tjetër të Kupës së Shqipërisë, që është edhe një nga objektivat e bluve për këtë sezon.
Trajneri Sulejman Demollari është shprehur se në takimin e sotëm pret reagimin e skuadrës pas asaj paraqitjeje të dobët në derbin me Partizanin. Ai thekson se ndaj Laçit ekipi do të dijë të tregojë reflektimin e duhur, pasi gjendja është e mirë. Sipas stafit teknik të Dinamos, ndeshja e sotme është mënyra më e mirë për të harruar lojën apatike të derbit, kështu që, përveç rezultatit pozitiv, pritet që lojtarët të zhvillojnë një lojë sa më të bukur.
"Është një ndeshje që duhet vlerësuar, - citon trajneri Demollari. - Duhet të sigurojmë kualifikimin për në turin tjetër, pasi kupa bën pjesë në objektivat e Dinamos për këtë vit. Natyrisht që jemi të favorizuar nga rezultati i ndeshjes së parë, por kërkoj që skuadra të japë maksimumin. Gjithashtu, sot më intereson më shumë të shoh reflektimin e ekipit pas ndeshjes me Partizanin, e cila duhet fshirë sa më shpejt nga kujtesa jonë. Dua të shoh grintë dhe luftë sportive nga të gjithë lojtarët në fushë. Në fundjavë kemi një tjetër takim të vështirë, atë me Teutën, ndaj një paraqitje e mirë sot ndaj Laçit do t'i shërbente më shumë moralit të skuadrës."
Dje, blutë kanë bërë përgatitjet e fundit para ndeshjes me Laçin, ndërsa ekipi do të grumbullohet sot, në orën 10.30. Formacioni i parë nuk është përcaktuar dje nga stafi teknik dhe të gjithë lojtarët do të jenë të gatshëm për takimin e sotëm. Gjithçka do të vendoset sot para fillimit të ndeshjes, por parashikohet të ketë disa ndryshime. Kjo pasi disa nga titullarët e ekipit janë të ngarkuar me kartonë dhe rrezikojnë skualifikimin për ndeshjen me Teutën e Durrësit. Kështu, ndryshimet mund të jenë në të tri repartet, duke përfshirë edhe portën, të cilën mund ta mbrojë korçari Gjika, pasi Lika mund ta fillojë nga stoli. Në mesfushë, pas një mungese disi të gjatë, rikthehet Qosa, i cili mund të luajë që nga minuta e parë bashkë me Dalipin. Ndërkohë, për sa i përket sulmit, një vend titullari mendohet të zërë Tiko, që mund të ketë përkrah Xhihanin ose Rizvanollin.

__________________
Lo scopo della nostra vita è di servire la Forza che ci ha creati,e dalla cui misericordia o approvazione dipende il nostro stesso respiro,servendo con lealtÃ_ le Sue creature.Questo significa amore,che dovrebbe sostituire l'odio che si vede ovunque.

Denonco këtë mesazh tek moderatorët | IP: e regjistruar

Regjistruar: 05/02/2003
Vendbanimi: Rio
Mesazhe: 2547

Mbrojtësi Erion Xhafa do t'i mungojë Dinamos në takimin e sotëm me Laçin për kupë. Lojtari ka pësuar një tërheqje muskulare në stërvitje dhe mjeku i skuadrës e ka këshilluar të mos luajë në ndeshjen e sotme, për t'u riaftësuar plotësisht plotësisht përpara ndeshjes me Teutën. Kështu, mbrojtësi Xhafa do t'u shtohet mungesave të kapitenit Pisha dhe mesfushorit Bakalli, të dy të skualifikuar për shkak kartonësh në takimin e sotëm. Të tre këta futbollistë do të zhvillojnë një seancë stërvitore sot paradite për të ruajtur formën sportive.

__________________
Lo scopo della nostra vita è di servire la Forza che ci ha creati,e dalla cui misericordia o approvazione dipende il nostro stesso respiro,servendo con lealtÃ_ le Sue creature.Questo significa amore,che dovrebbe sostituire l'odio che si vede ovunque.

Denonco këtë mesazh tek moderatorët | IP: e regjistruar

Regjistruar: 05/02/2003
Vendbanimi: Rio
Mesazhe: 2547

Portieri i bluve shprehet optimist për tri pikët në sfidën që do të luhet nesër në "Niko Dovana"

Dinamoja do të luajë nesër një tjetër ndeshje shumë të vështirë në kampionat. Kundërshtarja e bluve në javën e 14-të është Teuta e Durrësit, që aktualisht mban vendin e dytë në klasifikim. Kjo skuadër e ka vënë në vështirësi Dinamon edhe në takimin e fazës së parë, të luajtur në "Selman Stërmasi", ku ka arritur t'i marrë një pikë të vlefshme. Ndeshja e nesërme cilësohet tepër vendimtare nga dinamovitët për ecurinë e kampionatit, sepse një rezultat tjetër negativ do t'i komplikonte shumë llogaritë për ta. Humbja në derbin e javës së kaluar me Partizanin la një shije mjaft të hidhur te blutë, pasi ata u shkëputën nga grupi i skuadrave që udhëheqin tabelën e klasifikimit në javët e deritanishme. Kështu, në takimin që do të luhet nesër në "Niko Dovana", Dinamoja do të kërkojë të marrë maksimumin e pikëve për të shlyer atë gabim.
Portieri Ilion Lika mendon se në ndeshjen e nesërme me Teutën, fitorja është më shumë se një detyrim për Dinamon. Sipas Likës, skuadra është e dënuar të fitojë në këtë ndeshje, pasi vetëm kështu mund të qëndrojë në objektivat që ka në këtë sezon. Ai e konsideron skuadrën durrsake një kundërshtare mjaft serioze, ndaj parashikohet një ndeshje shumë e fortë. Portieri i bluve pohon se me Teutën do të kërkohet rezultati pozitiv për të prishur atë imazh të keq që la për Dinamon loja në derbin me Partizanin.
"Me Teutën jemi "të dënuar" të fitojmë, - thekson Lika. - Për vetë synimet që kemi në këtë kampionat, nuk kemi rrugë tjetër dhe ndeshja në "Niko Dovana" do të jetë vendimtare për ne. Vijmë pas një paraqitjeje të dobët në derbin me Partizanin, prandaj me Teutën do të përpiqemi të bëjmë më të mirën për ta prishur atë imazh jo të këndëshëm që u krijua. Natyrisht që është një nga ndeshjet më të forta që luajmë jashtë fushe, por mendoj se gjithçka do të jetë e hapur. Për Teutën do të thosha se është një skuadër shumë kompakte, që e qarkullon mirë topin. Fazën e parë kemi barazuar me këtë skuadër në fushën tonë. Për më shumë, Teuta është një nga pretendentet kryesore për titull në këtë sezon dhe ndaj nesh do të kërkojë fitoren. Megjithatë, besoj se do të jetë një ndeshje e hapur dhe ne duhet të dimë t'i shfrytëzojmë me qetësi rastet për shënim që do të krijojmë. Na duhet të shënojmë sa më shpejt."
Portieri Lika mendon se ekipi ka mundësi për të reaguar si duhet ndaj Teutës dhe për të treguar se Dinamoja mbetet një nga pretendentet për të fituar titullin kampion." Kualifikimi për në turin tjetër të Kupës së Shqipërisë na ka shërbyer më shumë për moralin. Tani jemi më të qetë dhe shpresojmë që ndaj Teutës t'i rikthehemi fitores në kampionat. Pavarësisht se aktualisht jemi në vendin e katërt të renditjes, mendoj se vazhdojmë të jemi në luftën për titull dhe ndeshja me Teutën është rasti më i mirë për ta vërtetuar këtë gjë." Me këto fjalë e ka përfunduar deklaratën e tij portieri i Dinamos, Ilion Lika.

__________________
Lo scopo della nostra vita è di servire la Forza che ci ha creati,e dalla cui misericordia o approvazione dipende il nostro stesso respiro,servendo con lealtÃ_ le Sue creature.Questo significa amore,che dovrebbe sostituire l'odio che si vede ovunque.

Denonco këtë mesazh tek moderatorët | IP: e regjistruar

Regjistruar: 05/02/2003
Vendbanimi: Rio
Mesazhe: 2547

Gjatë këtij kampionati, blutë kanë qenë më rezultativë në ndeshjet jashtë fushës së tyre.

Edhe kjo javë rezervon një tjetër ndeshje të vështirë jashtë fushës për blutë e kryeqytetit. Takimi me Lushnjën do të luhet në fushën asnjanëse të Beratit dhe do të gjykohet nga gjyqtari Sokol Çekaj. Nëse do t'u referoheshim statistikave të ecurisë së Dinamos në këtë kampionat, do të shohim se elementi-fushë ka pak rëndësi për këtë skuadër. Madje mund të themi se ajo ka qenë më e suksesshme në takimet e luajtura jashtë, ndërkohë që ka lënë pikë tepër të vlefshme në takimet e luajtura në fushën e saj. Me përjashtim të ndeshjes me Besën e Kavajës, e cila u zhvillua në stadiumin e Kuçovës dhe përfundoi në barazim pa gola, blutë i kanë fituar të katër ndeshjet e luajtura jashtë, duke mos llogaritur humbjen me Partizanin. Mund të përmendim fitoret në fushat më të vështira të kampionatit tonë, siç është ajo e Elbasanit apo ajo e Durrësit. Duke pasur parasysh këtë fakt, mund të themi se Dinamoja është skuadra që nuk do t'ia dijë për fushën ku luan. Në këtë kontekst, mund të themi se Dinamoja është përpjekur të respektojë edhe traditën, pasi historikisht ka qenë një nga ekipet më të forta jashtë Tiranës.
Të njëjtën gjë skuadra e drejtuar nga trajneri Demollari do të përpiqet ta bëjë edhe në ballafaqimin e nesërm me lushnjarët, të cilët kanë arritur të marrin një pikë në takimin e fazës së parë, të luajtur në stadiumin "Selman Stërmasi". Lushnja është një nga skuadrat që i ka nxjerrë më shumë probleme Dinamos. Gjatë sezonit të kaluar, këto dy skuadra janë ndeshur katër herë ndërmjet tyre dhe Dinamoja ka arritur të fitojë vetëm një ndeshje me rezultatin 1-0. Lushnja ka fituar takimin e fazës së dytë 2-0, ndërkohë që Dinamoja ishte shkëputur nga lufta për titull. Ndërsa të dyja ndeshjet e vlefshme për çerekfinalet e Kupës së Shqipërisë kanë përfunduar në barazim 0-0 dhe blutë janë kualifikuar vetëm pas gjuajtjeve të 11-metërshave. Kështu, takimi i nesërm është vlerësuar maksimalisht nga Dinamoja, pasi do të luajë ndaj një kundërshtari me të vërtetë të fortë. Gjatë javës, trajneri Demollari ka punuar intensivisht me të tijtë, ndaj pritet që ekipi të fitojë tripikëshin, që do ta afrojë më shumë me kreun e renditjes.
Aktualisht, blutë gëzojnë një gjendje të mirë fizike, ndërsa fitorja e fundit e ka ngrohur së tepërmi atmosferën brenda skuadrës. Parashikohet që ndaj Lushnjës të luajë i njëjti formacion me atë të fitores së javës së kaluar, ndaj Teutës. Mungesa e vetme është ajo e mesfushorit të skualifikuar, Paulin Dhëmbi, i cili mund të zëvendësohet nga fieraku Artion Poçi. Ndërkohë, skuadra nuk ka probleme për sa u përket dëmtimeve, me përjashtim të portierit të dytë, Llazi Gjika, që ka munguar në stërvitjen e djeshme për shkak të një tërheqjeje muskulare. Sot, trajneri Sulejman Demollari do të zhvillojë edhe seancën e fundit stërvitore, ku do të japë udhëzimet e fundit përpara ndeshjes me Lushnjën.

__________________
Lo scopo della nostra vita è di servire la Forza che ci ha creati,e dalla cui misericordia o approvazione dipende il nostro stesso respiro,servendo con lealtÃ_ le Sue creature.Questo significa amore,che dovrebbe sostituire l'odio che si vede ovunque.

Denonco këtë mesazh tek moderatorët | IP: e regjistruar

Regjistruar: 05/02/2003
Vendbanimi: Rio
Mesazhe: 2547

Mesfushori korçar i bluve shprehet optimist për një paraqitje të mirë në sfidën e Shkodrës.

Futbollisti korçar i Dinamos, Paulin Dhëmbi, do të jetë i gatshëm për sfidën që skuadra e tij do të luajë nesër në stadiumin "Loro Boriçi" të Shkodrës. Mesfushori rikthehet nga skualifikimi prej një jave dhe shpreson që në takimin me shkodranët të ndihmojë ekipin për të marrë fitoren e radhës. Në ndeshjen me Vllazninë, blutë kanë rastin më të mirë për t'u ngjitur në vendin e dytë të klasifikimit. Vllaznia do të jetë ndeshja e fundit për fazën e dytë që Dinamoja do ta luajë jashtë fushës së saj. Dhëmbi thekson se skuadra është paraqitur mirë në ndeshjet e fundit, të cilat i ka zhvilluar jashtë. Ai beson se Dinamoja do të dijë ta ruajë këtë formë të mirë edhe në javët e ardhshme të kampionatit. Për këtë paraqitje vërtet të mirë të ekipit, Paulin Dhëmbi, për "Sportin shqiptar", do të pohonte:
"Më vjen vërtet mirë që ekipi ka disa javë, në të cilat po paraqet një formë vërtet të mirë, ku edhe rezultatet pozitive nuk kanë munguar. Këtë e tregoi edhe ndeshja e fundit në Berat ndaj Lushnjës, ku edhe pse kemi fituar në minutat shtesë, morëm tri pikë tepër të vlefshme. Më vjen mirë që edhe në këtë ndeshje fitoren Dinamos ia dha një korçar tjetër. Tiko na ka ndihmuar shumë në dy ndeshjet e fundit, ku, përveçse ka treguar një formë të mirë, ka shënuar edhe tre gola. Për arsye të kartonëve mungova ndaj lushnjarëve, por them se te Dinamoja ka shumë lojtarë të mirë, të cilët mund t'i zëvendësojnë siç duhet mungesat që mund të ndodhin gjatë rrugës së gjatë të kampionatit. Synimi i Dinamos është vetëm titulli kampion, ndërkohë që është për t'u luajtur edhe një numër i madh ndeshjesh deri në fund të sezonit. Pas rezultateve të mira të javëve të fundit jemi afruar me kreun dhe tani duhet të qëndrojmë me "këmbë në tokë", sepse në çdo 90-minutësh ekipi duhet të ketë përqendrim maksimal."
Ndërkohë, nëpërmjet takimit të prapambetur me Vllazninë, blutë shpresojnë ta ngushtojnë më shumë diferencën e pikëve me Tiranën kryesuese, por më parë duhet të mposhtin shkodranët në shtëpinë e tyre. Një fitore e mundshme në Shkodër do ta nxirrte Dinamon në vendin e dytë të klasifikimit, me 31 pikë. Në takimin me Vllazninë, Dhëmbi mendon se skuadra e tij do të marrë rezultat pozitiv: "Është një ndeshje shumë e vështirë për të dy ekipet. Edhe pse do të luajmë në Shkodër, ne do të kërkojmë që të dalim me një rezultat pozitiv nga kjo ndeshje dhe konkretisht me fitore. Nëse arrijmë të fitojmë, do t'i afrohemi më shumë Tiranës, që aktualisht mban vendin e parë në renditje. Në ndeshjet jashtë Tiranës kemi vetëm 1 humbje dhe le të shpresojmë se me lojën që do të zhvillojmë në "Loro Boriçi" do të kënaqim edhe sportdashësit shkodranë. Tashmë vëmendjen e kemi përqendruar vetëm në Shkodër dhe me ndihmën e fatit shpresojmë të dalim me një rezultat sa më të mirë nga kjo ndeshje."

__________________
Lo scopo della nostra vita è di servire la Forza che ci ha creati,e dalla cui misericordia o approvazione dipende il nostro stesso respiro,servendo con lealtÃ_ le Sue creature.Questo significa amore,che dovrebbe sostituire l'odio che si vede ovunque.

Denonco këtë mesazh tek moderatorët | IP: e regjistruar

Regjistruar: 05/02/2003
Vendbanimi: Rio
Mesazhe: 2547

Fieraku do të luajë stoper i djathtë ndaj Vllaznisë.

Mesfushori fierak Artion Poçi, një nga futbollistët që është aktivizuar në pozicione të ndryshme në fushë, ndaj Vllaznisë do të luajë në mbrojtje, përkrah Pishës e Gallos. Këtë fakt e ka pohuar vetë trajneri i Dinamos, Sulejman Demollari. Në Shkodër, fieraku do të zërë vendin e stoperit të djathtë, Erjon Xhafa, i cili është i skualifikuar pas daljes nga fusha me kartonin e kuq në ndeshjen me Lushnjën. Pas daljes me karton të kuq të Xhafës ndaj Lushnjës, Poçi ka lënë krahun e djathtë të mesfushës, duke kaluar pikërisht në pozicionin e stoperit të djathtë. Paraqitja e tij në minutat e mbetura të ndeshjes me Lushnjën, me sa duket, e ka bindur trajnerin e bluve ta nisë sfidën e nesërme me Vllazninë me Poçin në rolin e stoperit. Ndërkohë, në ndeshjet e mëparshme që Dinamoja ka zhvilluar në këtë sezon, ky futbollist ka provuar edhe disa role të tjera në fushën e lojës. Kështu, përveçse në qendër të mesfushës, që është pozicioni i tij natyral, ai është aktivizuar edhe në krahun e djathtë të mesfushës. Ndërsa në ndeshjen e Kupës së Shqipërisë, me Laçin, Poçi ka luajtur në rolin e liberos. Vetë futbollisti është shprehur se nuk ka asnjë problem për sa u përket pozicioneve të ndryshme në të cilat ka luajtur. "Për mua, pak rëndësi ka se në cilin repart të skuadrës do të aktivizohem. E rëndësishme është të japësh maksimumin në fushë për të ndihmuar ekipin në rrugën drejt fitores. Një gjë të tillë do të përpiqem të bëj edhe unë ndaj Vllaznisë. Kam luajtur në pozicione të ndryshme dhe nuk kam pasur asnjë vështirësi." Kjo ka qenë deklarata e shkurtër e mesfushorit fierak të Dinamos. Ndërkohë, Poçi shprehet optimist për një fitore në takimin e nesërm me Vllazninë.

__________________
Lo scopo della nostra vita è di servire la Forza che ci ha creati,e dalla cui misericordia o approvazione dipende il nostro stesso respiro,servendo con lealtÃ_ le Sue creature.Questo significa amore,che dovrebbe sostituire l'odio che si vede ovunque.

Denonco këtë mesazh tek moderatorët | IP: e regjistruar

Regjistruar: 05/02/2003
Vendbanimi: Rio
Mesazhe: 2547

Trajneri i bluve mendon se fitorja ndaj Vllaznisë erdhi si rezultat i gjendjes së mirë fizike që ka skuadra.

Fitorja e thellë në "Loro Boriçi" e ka ngjitur Dinamon në vendin e dytë të renditjes, duke e konfirmuar edhe njëherë këtë skuadër si një nga pretendentet kryesore në luftën për titullin kampion. Kur kanë mbetur edhe tri javë nga faza e dytë, Dinamon e ndajnë vetëm 4 pikë nga vendi i parë, që mbahet nga Tirana. Blutë kanë zhvilluar një ndeshje mjaft të bukur ndaj Vllaznisë në Shkodër dhe në fund janë shpërblyer me një tripikësh plotësisht të merituar. Ekipi i drejtuar nga trajneri Sulejman Demollari e zgjidhi takimin shumë shpejt, duke shënuar tre gola që në pjesën e parë dhe një tjetër që në fillim të pjesës së dytë. Sipas trajnerit të Dinamos, ekipi e meritoi fitoren, sepse arriti t'i impononte kundërshtarit lojën e tij dhe shfrytëzoi si duhet pikat e dobëta të Vllaznisë. Një faktor tjetër që ndikoi në fitoren bindëse të Dinamos, trajneri Demollari konsideron edhe gjendjen e mirë fizike të skuadrës së tij, kundrejt asaj të Vllaznisë.
"Fitorja në Shkodër na entuziazmoi të gjithëve, - shprehet trajneri Demollari. - Kishim shansin më të mirë për të kapur vendin e dytë dhe ditëm ta shfrytëzonim. Kemi bërë një paraqitje mjaft të mirë ndaj Vllaznisë, ku, përveç katër golave të shënuar, zhvilluam edhe një lojë interesante. E zgjidhëm shumë shpejt ndeshjen, duke shënuar që në minutat e para me anë të Ziambos dhe më pas gjithçka foli për Dinamon. E kthyem lojën në favorin tonë, çka bëri që të shënonim edhe tre gola të tjerë, duke siguruar fitoren. Mendoj se Dinamoja arriti të bënte diferencën në takimin me Vllazninë, për shkak edhe të gjendjes së lartë fizike që ka. Mund të them se ekipi është në ngritje të vazhdueshme, ku në tri javët e fundit ka arritur të marrë maksimumin e pikëve. Vlen të theksohet se më e rëndësishme është se në skuadër po forcohet gjithmonë e më shumë ndjenja e profesionalizmit."
Trajneri i bluve pohon se dalja e Dinamos në vendin e dytë të klasifikimit tregon qartë synimet që skuadra ka për këtë sezon. Ai thekson se blutë do të kërkojnë ta marrin sa më shpejt kreun e renditjes në javët e ardhshme, duke synuar fitoren në çdo ndeshje. Tri ndeshjet e mbetura të fazës së dytë, ekipi do t'i zhvillojë në Tiranë, ku më e forta do të jetë pa diskutim derbi me Tiranën. Ndërkohë, nesër, Dinamoja do të luajë ndeshjen e javës së 16-të të kampionatit dhe përballë do të ketë ekipin e Elbasanit. Ky takim do të zhvillohet në stadiumin "Qemal Stafa", në të cilin blutë rikthehen pas disa javësh.
Trajneri Demollari, që ka debutuar me sukses në stolin e Dinamos, pikërisht ndaj Elbasanit në fazën e parë, mendon se skuadra do të vazhdojë serinë e fitoreve edhe këtë javë. Ai thotë se kundërshtari vlerësohet maksimalisht, ndërsa Dinamoja, ashtu si në ndeshjen e fundit me Vllazninë, duhet ta gjejë golin që në fillim.
"Me Elbasanin nuk do të jetë ndeshje e lehtë. Dihet që skuadrat e rretheve vijnë në Tiranë për të rrëmbyer pikë dhe luajnë më shumë në mbrojtje, por ne nuk duhet të biem kurrsesi në grackën e tyre. Si në ndeshjen me Vllazninë, duhet të shënojmë sa më shpejt për t'i hapur rrugën fitores. Skuadra është plotësisht e përqendruar dhe besoj se do të vazhdojmë serinë e fitoreve edhe këtë javë ndaj Elbasanit." Me këto fjalë e ka përfunduar deklaratën e tij trajneri i Dinamos, Sulejman Demollari.

__________________
Lo scopo della nostra vita è di servire la Forza che ci ha creati,e dalla cui misericordia o approvazione dipende il nostro stesso respiro,servendo con lealtÃ_ le Sue creature.Questo significa amore,che dovrebbe sostituire l'odio che si vede ovunque.

Denonco këtë mesazh tek moderatorët | IP: e regjistruar

Regjistruar: 05/02/2003
Vendbanimi: Rio
Mesazhe: 2547

Trajneri i bluve shprehet i kënaqur me ecurinë e deritanishme të fazës përgatitore. Sot, miqësorja në Peqin
Demollari: Dinamo në lartësinë e duhur

Trajneri i Dinamos, Sulejman Demollari, pohon se ecuria e minifazës përgatitore që skuadra po zhvillon në Tiranë, është e kënaqshme. Në javën e parë të minifazës, futbollistët kanë bërë stërvitje me dy seanca në ditë, ndërsa këtë javë stafi teknik i ekipit duket se po u kushton më shumë rëndësi takimeve miqësore. Dje paradite, blutë kanë bërë vetëm vrap nga Kodrat e Liqenit Artificial, kurse pasdite zhvilluan një ndeshje miqësore me ekipin Shpresa të Dinamos, i cili po stërvitet nga trajneri Andrea Marko.
Formacioni dinamovit ka fituar me lehtësi ndaj Shpresës dinamovite, madje me një rezultat të thellë. Trajneri Demollari i ka aktivizuar të gjithë lojtarët që ka pasur në dispozicion, me përjashtim të atyre që kanë qenë të dëmtuar. Kështu, në takimin e djeshëm nuk luajtën portieri Lika, mesfushorët Qosa e Ishka, si dhe senegalezi Kelta. Në përfundim të ndeshjes, trajneri Demollari është i shprehur i kënaqur me paraqitjen e skuadrës. Sipas tij, gjendja fizike e futbollistëve është në lartësinë e duhur, pasi lëvizshmëria e tyre në fushë ka qenë mjaft e mirë. Në deklaratën e tij, trajneri i Dinamos do të shprehej:
"Unë do të thosha se jam i kënaqur me ecurinë e deritanishme të fazës përgatitore. Tashmë jemi në javën e dytë dhe gjithçka ka shkuar sipas programit që kishim përgatitur. Kryesorja është që në aspektin fizik skuadra gëzon gjendje të mirë. Gjatë ndeshjes vura re se lojtarët kishin një lëvizshmëri të madhe në fushë, çka tregon se janë stërvitur mirë gjatë këtyre ditëve."
Sot, blutë do të zhvillojnë edhe miqësoren e dytë me Shkumbinin në stadiumin e qytetit të Peqinit. Edhe në katër ndeshje, ashtu si në atë me Lushnjën, që u luajt ditën e shtunë, trajneri Demollari do të aktivizojë që nga minuta e parë katër futbollistët brazilianë, të cilët vazhdojnë provën. Sipas trajnerit të Dinamos, katër lojtarët nga vendi i sambës duken interesantë, por një vendim përfundimtar në lidhje me qëndrimin e tyre do të merret në fundjavë, pas miqësores me Teutën në Durrës. Shqetësimi i vetëm për trajnerin Demollari vazhdon të jetë mungesa e Ziambos, i cili nuk është bashkuar ende me skuadrën. Në vazhdim të deklaratës së tij, tekniku dinamovit thekson: "Deri të shtunën do të zhvillojmë edhe dy ndeshje të tjera miqësore, që do të na ndihmojnë më shumë për konsolidimin e ekipit përpara fillimit të fazës së tretë. Sot do të luajmë në Peqin me Shkumbinin, ndërsa të shtunën në Durrës me Teutën. Gjithashtu, deri atëherë do të kemi vendosur përfundimisht edhe për katër lojtarët brazilianë, të cilët mund të them se më duken interesantë. Natyrisht që na shqetëson mungesa e sulmuesit afrikan, Januari Ziambo, pasi është lojtar i formacionit të parë, por nuk kemi ç'të bëjmë. Megjithatë, mendoj se ky problem do të zgjidhet shpejt dhe gjithçka do të jetë gati para fillimit të gjysmës së dytë të kampionatit."

__________________
Lo scopo della nostra vita è di servire la Forza che ci ha creati,e dalla cui misericordia o approvazione dipende il nostro stesso respiro,servendo con lealtÃ_ le Sue creature.Questo significa amore,che dovrebbe sostituire l'odio che si vede ovunque.

Denonco këtë mesazh tek moderatorët | IP: e regjistruar

Regjistruar: 05/02/2003
Vendbanimi: Rio
Mesazhe: 2547

Mesfushori senegalez i bluve pohon se ka vështirësi në komunikimin me lojtarët e tjerë skuadrës.

Para fillimit të fazës së tretë të kampionatit, stafi teknik i Dinamos i besoi rolin e organizatorit senegalezit të ardhur gjatë merkatos së dimrit, Keita. Ai është aktivizuar titullar në të dyja ndeshjet e luajtura të fazës së tretë, me Besën dhe Shkumbinin, si dhe në të gjitha miqësoret e zhvilluara gjatë minifazës përgatitore. Në takimin e fundit në kampionat, mesfushori u ndëshkua me kartonin e kuq për një ndërhyrje të ashpër ndaj kundërshtarit, kështu që ndaj Vllaznisë do t'i mungojë skuadrës bashkë me mesfushorin tjetër, Paulin Dhëmbi. Keita shprehet i kënaqur për atmosferën që ka gjetur në kampin dinamovit dhe shpreson që në të ardhmen të bëhet pjesë e rëndësishme e skuadrës. Ai mendon se është përshtatur mirë me lojën e ekipit dhe me skemat e aplikuara nga trajneri Demollari. Por senegalezi thekson se ka shumë vështirësi në komunikimin me lojtarët e tjerë të skuadrës, sidomos gjatë aksioneve të shpejta të lojës. Gjuha e vetme që lojtari zotëron është frëngjishtja, ndërsa shpreson që me kalimin e kohës të mësojë sado pak shqip.
"Problemi i vetëm është kominikimi, - pohon Keita në një koment për "Sportin shqiptar". - Kam vetëm pak javë që kam ardhur te Dinamo dhe ende nuk i kam mësuar mirë emrat e të gjithë shokëve të skuadrës. Gjatë lojës e kam shumë të vështirë të merrem vesh me lojtarët e tjerë, sepse unë nuk di asnjë fjalë shqip. Flas vetëm frëngjisht, por besoj se do të mësoj të paktën disa fjalë shqip. Është një problem që duhet ta zgjidh sa më shpejt, sepse komunikimi është i domosdoshëm. Ndërsa të gjitha gjërat e tjera kanë shkuar mirë për mua dhe të gjithë më kanë ndihmuar të përshtatem sa më mirë me lojën e ekipit."
Ndërkohë, mesfushori i bluve shpreh keqardhjen për humbjen e së premtes me Shkumbinin, pas së cilës ekipi humbi vendin e dytë të renditjes. Përveç terrenit tejet të rënduar, afrikani mendon se një tjetër faktor që ndikoi në rezultatin e ndeshjes ishte dhe gjykimi. Në vazhdim të komentit të tij, ai thekson: "Nuk më vjen aspak mirë që humbëm këtë javë, pasi kaluam në vendin e tretë të klasifikimit. Kushtet në të cilat u luaj ndeshja ishin me të vërtetë skandaloze, por unë nuk jam i kënaqur as me gjykimin e ndeshjes. Mendoj se nuk meritoja të ndëshkohesha me karton të kuq për ndërhyrjen që bëra. Natyrisht që nuk meritonim të humbisnim në atë ndeshje, por tani duhet të mendojmë më shumë për të ardhmen."
Sipas Keitës, Dinamo është një skuadër e kompletuar dhe e përgatitur mirë, kështu që do të luftojë deri në fund për realizimin e objektivave që ka për këtë sezon. Senegalezi nuk ka ende një njohje të mirë të skuadrave të tjera të kampionatit shqiptar, por mendon se gjithçka për sa i përket titullit kampion do të diskutohet midis tri ekipeve që aktualisht mbajnë vendet e para të renditjes. "Nuk mund të gjykoj me saktësi sesa i vështirë është kampionati, pasi deri tani njoh vetëm dy skuadrat me të cilat ka luajtur Dinamo në kampionat, Besën dhe Shkumbinin. Megjithatë, mund të them se titullin do ta fitojë një prej tri skuadrave të para në renditje. Besoj se Dinamo i ka të gjitha mundësitë për ta arritur këtë trofe. Distanca prej katër pikësh nga vendi i parë është plotësisht e rikuperueshme, duke pasur parasysh numrin e madh të ndeshjeve që kanë mbetur për t'u zhvilluar," - përfundon komentin e tij senegalezi i Dinamos, Keita.

__________________
Lo scopo della nostra vita è di servire la Forza che ci ha creati,e dalla cui misericordia o approvazione dipende il nostro stesso respiro,servendo con lealtÃ_ le Sue creature.Questo significa amore,che dovrebbe sostituire l'odio che si vede ovunque.

Denonco këtë mesazh tek moderatorët | IP: e regjistruar