Berisha pranoi dorëheqjen e Rusmalit: Solli një standard të ri
Nga Armand Maho
Kryeministri, Sali Berisha, ka pranuar dje dorëheqjen e ministrit të Drejtësisë, Ilir Rusmali, duke pranuar se ish-ministri vendosi një standard të ri në lidhje me moralin e qeverisjes. Kryeministri pranoi se vetë ministri i Drejtësisë s`ka pasur asnjë lidhje me akuzat që iu hodhën nga ish-drejtori i Burgjeve, Shehri, megjithatë ka pranuar dorëheqjen e tij, duke prezantuar dhe ministrin e ri të Drejtësisë Enkelejd Alibeaj. Unë pranova dorëheqjen e zotit Rusmali me bindjen time më të thellë se ai nuk ka pasur asnjë lidhje, përveç lidhjes së gjakut, me përpjekjen e të vëllait për të përfituar në tendera. Unë e pranova dorëheqjen e zotit Rusmali, sepse nuk mund të refuzoj standardin e ri që bashkëpunëtori im vuri për politikën dhe zyrtarin shqiptar. Standardin më të lartë dhe të civilizuar të përgjegjësisë së një zyrtari që kontraston, aq sa kontraston dita me natën, errësira me dritën, me qëndrimet e mëparshme të zyrtarëve, të cilët, pavarësisht se familjarët e tyre më të afërt, fëmijë, prind, bashkëshorte a bashkëshorti kapeshin me drogë, me trafiqe e motele prostitucioni, rrëmbenin tendera, shkrehnin breshëri mbi qytetarë të tjerë dhe vazhdonin të qetë në postin e tyre, sikur asgjë të mos ekzistonte, përveç interesave vetjake, - tha kryeministri.
Ndërkohë, gjatë pyetjeve dhe përgjigjeve të gazetarëve, kryeministri është shprehur se çdo akuzë e ngritur në media, kur ka pasur fakte, është verifikuar nga ana e zyrës së tij, megjithëse në shumë raste është vënë re se mekanizmi ka lëvizur ngadalë, ose ka mbetur në vend. Në të njëjtën kohë, Berisha foli dhe për takimin që zhvilloi në mesditë me Presidentin e Republikës, por nuk dha informacion, nëse është diskutuar në këtë takim në lidhje me Prokurorin e ardhshëm të Republikës. Nga ana e tij, Berisha u shpreh se për një kohë të pacaktuar nuk do të ketë ndryshime në qeveri dhe se të gjithë ministrat e kabinetit janë në punë me kapacitet të plotë. Më poshtë do të japim pyetje-përgjigjet e konferencës.
Dje, ministri i Drejtësisë, Rusmali, tha se më 9 maj të këtij viti ju ka kërkuar shkarkimin e drejtorit të Burgjeve, Shehri. A e konfirmoni një fakt të tillë?
Së dyti, në pak muaj kjo është dorëheqja e dytë në kabinetin tuaj. A mos është kjo pasojë e shkak i klaneve brenda PD?
Unë shqyrtoj dhe do të shqyrtoj shqetësimet e bashkëpunëtorëve të mi. Unë e shpreha atë çfarë kisha për zotin Rusmali. Ju vazhdoni të kërkoni eskimezë në shkretëtirë, por nuk keni për ti gjetur, pasi, siç e dini, nuk ka të tillë në shkretëtirë.
Edhe me ngrohjen globale do të duhen dekada që të zbresin. Njëherë përnjëherë, ata janë në akuj dhe jetojnë mirë atje.
Sot, në mesditë, jeni takuar me Presidentin e Republikës, zotin Bamir Topi. Ideja e këtij takimi ka të bëjë me shkarkimin e Prokurorit të Përgjithshëm, zotit Theodhori Sollaku dhe emërimin e ministrit të ri të Drejtësisë?
Unë kam takime dhe konsultime të vazhdueshme me Presidentin e Republikës. Marrëdhëniet tona kërkojnë që ne të kemi konsultime e takime të shpeshta.
Përherë e më shumë janë shtuar zërat për ndryshime në kabinetin qeveritar nga aleatët tuaj, por edhe nga brenda PD. Mendoni se këto ndryshime do të jetë së shpejti?
Qeveria është në kapacitet të plotë pune. Dua tju informoj se në Raportin e Komisionit Evropian unë konstatova dy anë shumë pozitive: si vlerësimin e të gjitha reformave, ashtu edhe listimin e detyrave që duhet të përmbushen. Unë do të filloj së shpejti programin dhe zbatimin e tij me çdo ministri dhe agjenci, për të përmbushur detyrimet e reja që nxjerr Raporti i Progresit, në mënyrë që të afrohemi sa më pranë me ato që quhen standarde acqui communitaire dhe kriteret e Kopenhagenit, që Shqipëria të jetë edhe më e përzgjedhshme për procesin e integrimit. Shqipëria, sikurse vendet e Ballkanit Perëndimor, janë të përzgjedhur dhe dyert janë të hapura për to, por, në këtë mënyrë, ne e bëjmë vendin edhe më të përzgjedhshëm.
Zoti kryeministër, nëse ju mund ta na jepni një përgjigje më të saktë, a do ketë një riformatim të qeverisë, në mënyrë që të arrihen këto standarde që ju thatë, të vlerësuara nga progres-raporti i KE?
Unë kam besim të plotë se ministritë dhe agjencitë përkatëse kanë të gjithë potencialin për realizimin e këtyre standardeve. Natyrisht, vlerësimi do të jetë vetëm mbi bazën e këtyre standardeve dhe kjo do të ndodhë.
Ju thatë se zoti Rusmali ka vendosur një standard të ri, një moral të ri në politikën shqiptare. Kemi dëgjuar shumë akuza për ministrat tuaj, megjithëse ju iu referuat kohës së qeverisjes socialiste, por nuk ka ndodhur ky standard. Pas largimit të zotit Rusmali dhe vendosjes së këtij standardi të ri, ju do të kërkoni që çdo ministër që akuzohet për lidhje të familjarëve të tij, apo të vet ministrave, duhet të japë dorëheqjen?.
Shtypi bën akuza të shumëllojta. Por, në rast se ju jeni në gjendje të më jepni një akuzë konkrete, atëherë të jeni të sigurt se unë do ta shqyrtoj. Zoti Rusmali, që lë këtë detyrë, ka pasur nga unë një porosi konstante, që ditën e tij të punës ta fillojë me shkrimet e shtypit. Shkrimet që duan të bëjnë politikë, le të bëjnë, sepse ne jemi vend i lirë. Ndërsa shkrime të tjera, të cilat sjellin dokumente dhe fakte, në mënyrë kategorike nuk janë injoruar dhe nuk do të injorohen. Ndaj, nëse përdor shumësat apo vendos etiketa pa fakte konkrete, këto janë të vështira për tu cilësuar. Por në asnjë rast, në asnjë rrethanë, kryeministri dhe kjo qeveri nuk lakohen para aktit të cilitdo zyrtari. Natyrisht, konkretizimi është i domosdoshëm, sepse pa konkretizim nuk mund të mbahen qëndrime.
Unë nuk di ndonjë vend tjetër që në harkun kohor prej 60 ditësh të ketë vendosur para ligjit rreth 30 zyrtarë. Unë ju garantoj se në vendosjen para ligjit nuk ka dhe nuk do të ketë asnjë dallim nga niveli, në të cilin ata ndodhen. Natyrisht, kryeministri apo ministri i Drejtësisë nuk mund të bëhen hetues. Ne i kemi çuar dhe do ti çojmë para ligjit të gjitha rastet dhe ndihemi shumë të fortë në këtë proces. Nëse opozita, gazetat shfrytëzojnë liritë për të menduar se njollosin, kjo gjë është e tejkaluar. Ne jemi te ky standard, standardi që dëshmoi zoti Rusmali. Ky është standardi i qeverisë sonë.
Pyetja ka lidhje me kandidatin për ministër të Drejtësisë, zotin Alibeaj, i cili, me sa dimë, është një nxënës i zotit Rusmali dhe e ka sjellë ai pranë Partisë Demokratike. Çfarë roli do të ketë Ministria e Drejtësisë në reformën në fushën e drejtësisë, apo do të jetë vetëm një domen i presidentit?
Reforma në drejtësi është komplekse dhe unë jam shumë optimist për këtë reformë. Ndryshimi që ndodhi në Këshillin e Lartë të Drejtësisë është thelbësor. Presidenti, që kryeson Këshillin e Lartë të Drejtësisë, ka të gjithë vullnetin për të proceduar, në bashkëpunim të ngushtë me parlamentin, me Ministrinë e Drejtësisë, që është shtyllë kryesore në këtë reformë. Por, reforma e drejtësisë është më multidimensionale, sesa reformat e tjera.
Si ka mundësi, zoti kryeministër, që ju vendosni në shenjë barazie pranimin e të dy dorëheqjeve? Kemi parasysh dorëheqjen e zotit Rusmali dhe atë të një drejtori.
Për dorëheqjen e zotit Rusmali unë bëra të gjitha shpjegimet e duhura. Unë nuk mund të refuzoja standardin që vendosi zoti Rusmali, sepse ai është një politikan afatgjatë. Zoti Rusmali zgjodhi, në një moment të caktuar të karrierës së tij, të dëshmojë një standard, i cili deri më sot ka munguar. Në këtë drejtim, përgjigjja ime ishte shumë e qarte.
Denonco kėtė mesazh tek moderatorėt | IP: e regjistruar