Vizioner
...ne Timon
Regjistruar: 23/11/2007
Vendbanimi: Frankfurt
Mesazhe: 6857
|
Ka humbur pakica
Mero Baze
| 10/05/2011 |
Partia Demokratike e Sali Berishës ka pësuar një humbje historike nga Saranda deri në Has, në një votim që nga shoqëria shqiptare është konsideruar realisht si një referendum kundër regjimit. Shqiptarët i janë përgjigjur politikisht thirrjes së opozitës për të ndëshkuar një regjim, i cili për dy vite radhazi refuzoi tu tregonte shqiptarëve ku kishte shkuar vota e tyre dhe ndërtuan një qeveri bazuar tek figurat më peng që mafia shqiptare dhe ajo ndërkombëtare ka në politikën shqiptare.
Votimi i djeshëm së pari realizoi kërkesën e shqiptarëve për hapjen e kutive. Atë që për dy vite rresht Berisha nuk e bëri duke shpresuar se do të gjunjëzonte opozitën, e bënë dje shqiptarët duke i dëshmuar Berishës se është pakicë në shoqërinë shqiptare. 8 Maji hapi kutitë e mbyllura të 28 Qershorit duke dëshmuar se qeveria është jolegjitme dhe duhet të ikë një orë e më parë.
Nëse në kërkesën për hapjen e kutive opozita ka pranuar rezultatin e zgjedhjeve të 28 Qershorit dhe legjitimitetin e parlamentit, me votimin e 8 majit ajo ka bërë një referendum për qëndrimin e saj ndaj 28 Qershorit, referendum që bën të domosdoshme zgjedhjet e parakohshme parlamentare.
Ky referendum së dyti i dha fund përpjekjeve të liga të Berishës për rrënimin e opozitës dhe krijimin e një opozite luajale me regjimin e tij. Shqiptarët votuan kundër tentativës për të prodhuar një regjim putinist në Shqipëri ku media dhe antiopozitarët kishin krijuar një aleancë të fortë pro qeverisë, për të rrënuar çdo vlerë opozitare në vend. Në një situatë të paprecedent politike, media shqiptare u gjunjëzua para presioneve të qeverisë për të mos denoncuar skandalet e saj dhe bëri një rezistencë të pjesshme dhe aspak dinjitoze ndaj trukimit të fushatës elektorale të saj.
Për vite me radhë të gjithë ata që do të studiojnë shkencat e komunikimit në këtë vend dhe teorinë e gazetarisë, mund të marrin emisionin "Opinion" të së dielës në mbrëmje në TV Klan për të parë deri ku ka shkuar vulgariteti i gazetarëve- shërbëtorë të pushtetit dhe deri ku mund të shkojë papërgjegjësia për të futur vendin deri në luftë civile për një grusht pare të paguara nga pushteti në këtë fushatë elektorale.
Me një histeri që tejkalonte vetë zellin e humbësve të këtyre zgjedhjeve, gazetarë që për vite të tëra i kanë shitur moral medias shqiptare, u shfaqën të shfytyruar dhe të papërgjegjshëm para publikut, vetëm nga ideja se regjimi dhe plani i tij kundër opozitës nuk po votëbesohej nga shqiptarët. Si për ta bërë më të plotë këtë karikaturë, në ekran u shfaq dhe Shkëlzen Maliqi, që nisi të ngjyente gishtat me pështymë si Ilir Meta për të gjetur të dhënat e sondazhit Gani Bobi, që i ishin ngatërruar me një përzierje gjuhësore mes toskërishtes së Kastriot Islamit dhe tropojanishtes së Sali Berishës.
Por kjo fushatë ka tronditur thellë dhe mbështetësit e sinqertë të Partisë Demokratike. Është e vërtetë se ata nuk e kanë besuar udhëheqësin e tyre kur ka thënë se jemi vendi me rritje ekonomike më të lartë në botë, apo kur ka thënë se është duke luftuar korrupsionin, por kurrë nuk e kanë menduar se ai do të shiste aspiratat e tyre për hir të familjes së tij. Sot demokratët e Shqipërisë nuk duhet të ndjehen aspak të humbur pasi në të vërtetë ata nuk kanë humbur asgjë.
Në Tiranë ka humbur Argita Berisha, Shkëlzen Berisha dhe Damir Fazlliçi. Kandidati i tyre nuk ka marrë votëbesimin e kryeqytetit, për fatin e mirë edhe të demokratëve. Në Vlorë nuk kanë humbur demokratët, por sekserët e Shkëlzenit dhe Argitës. Në Kavajë nuk kanë humbur demokratët, por eunukët e Shkëlzenit dhe Argitës. Në Laç nuk kanë humbur demokratët, por marionetat e Familjes në pushtet. Demokratët e vërtetë që kanë menduar se kanë fituar pushtetin qysh në vitin 2005, akoma nuk e kanë prekur atë.
Pushteti kaloi nga Fatos Nano tek një grusht njerëzish të familjes Berisha që i shikojnë demokratët si mish për top. Ata sot duhet të ndjehen të fituar se kanë hedhur një hap të madh përpara nga shitja e interesave të tyre nga një tufë njerëzish që kanë parim të bëhen miliarderë me pushtetin e fituar me votat e tyre. Sot nuk ka humbur asnjë demokrat i ndershëm shqiptar. Sot kanë humbur vetëm ata që kanë vjedhur dhe plaçkitur edhe demokratët shqiptarë.
Për këtë arsye disa bastione simbolike të PD, ku shquhet Kavaja dhe Laçi, i dhanë leksione të forta demokracisë shqiptare duke hedhur në kosh të plehrave marionatat e Sali Berishës.
Zgjedhjet e 8 Majit ishin votë kundër pushtetit personal dhe familjar të Sali Berishës, kundër Monarkisë së tij të Korrupsionit dhe jo votë kundër demokratëve shqiptarë. Demokratët shqiptarë fituan aty ku meritonin në jug apo veri, atje ku nuk ishin simbole të Familjes në pushtet apo çerdhe korrupsioni. Demokratët humbën atje ku bashkiakët ishin bërë si punonjës hipoteke të Shkëlzenit dhe Argitës, atje ku demokratët e vërtetë nuk e preknin pushtetin e tyre, por persekutoheshin prej tij.
Edhe humbja e Bollanos në Himarë i ka ardhur më shumë prej mbështetjes së tij prej Sali Berishës se sa prej afrimit të tij si një nacionalist i vjetër. Shqiptarët kishin identifikuar në këto zgjedhje një shënjestër dhe ajo ishte Sali Berisha. Tashmë ai ka marrë një votë të qartë popullore kundër dhe duhet të mbajë fjalën që do ta lexojë këtë rezultat. Shpresoj mos ta lexojë në alfabetin e Bin Ladenit, por në alfabetin perëndimor dhe t'i hapë rrugë kthimit të normalitetit demokratik në Shqipëri.
Ai është sot figura më antipopullore në vend dhe nuk mund të mbajë peng qeverisjen e vendit për shkak të interesave të Familjes së tij. Në këto zgjedhje si rrallëherë në botë ka humbur pakica që na qeveriste, ka humbur pakica që na kontrollonte liritë tona, pronat tona, bizneset tona, ka humbur pakica që ka vjedhur pushtetin e shumicës së demokratëve shqiptarë. Ka humbur një pakicë e paligjshme që nuk përfaqëson as demokratët dhe as socialistët shqiptarë, por Familjen e Sali Berishës.
Le të shkojnë pa bërë dëm nëse duan të kenë paqe me veten dhe shqiptarët në ditët që vijnë.
__________________
I am the author of my life;
unfortunalty, I'm writing in pen & can't erase my mistakes.
Denonco kėtė mesazh tek moderatorėt | IP: e regjistruar
|