volter
shpirt artisti
Regjistruar: 19/11/2003
Vendbanimi: Moscow
Mesazhe: 4646
|
freespirit , eshte shume e vertete qe ne vetem mesojme...
Ndersa ti lost_soul, te pershendes me nje poezi, sepse kuptove kendshem merzitjen time...
Kush më ngroh, kush më do akoma?
Jepmë duart e ngrohta!
Jepma zjarrin e zemrës!
I dergjur, plot rrëqethje,
Si një që po vdes, të cilit i ngrohin këmbët,-
Shkundem nga ethe të panjohura,
Dridhem nga shigjeta të mprehta e të akullta cingërime,
Që mi hedh ti, o mendim!
I paemër, i fshehur, i lemerishëm,
Je ti, gjahtar pas reve!
I goditur prej teje,
Sypërtallës që më vështron përmes errësirës,
Dergjem.
Kërrusem, përpëlitem dhe mundohem
Nga të gjithë martirët e përjetshëm,
I qëlluar
Prej teje, gjahtar mizor,
Zot i paemër!
Qëllomë më fort!
Qëllomë edhe një herë!
Përshkoma dhe shqyema zemrën!
Përse duhet të më mundosh
Me shigjeta me dhëmbëza të pamprehura?
Përse më vështron,
Mundimtar njerëzish që su lodhe,
Me sytë dashakeqës, me shkrepëtima hyjnore?
Nuk do të më vrasësh,
Por vetëm të më mundosh e të më mundosh?
Përse më mundon,
Zot i panjohur dhe dashakeqas?
Hë, hë! Po më afrohesh vjedhurazi?
Në këtë mesnatë
Çkërkon? Fol!
Më shtrëngon e më shtyp egër.
Tani më erdhe fare pranë!
Ik! Ik!
Më dëgjon frymëmarrjen,
Më përgjon zemrën,
Ziliqar,
Po përse më ke zili?
Ik! Ik! Përse shkallët?
Kërkon të futesh brenda
Në zemër,
Të ngjitesh, në më të fshehtat
Mendime?
I paturp! I panjohuri - kusar!
Çkërkon të grabitësh!
Përse kërkon të më përgjosh?
Përse ngulmon të më ndihmosh,
O mundimtar,
O Zot - xhelat!
Apo duhet si qen
Përpara teje të vij vërdallë,
Dhe të të fal, i përhumbur,
Dashuri lajkatare?
Më kot! Shpomë më thellë,
Thumbëtar mizor! Jo,
Nuk jam qen, jam gjah i egër për ty,
Gjahtar shpirtkatran!
Jam i burgosuri yt më krenar,
O cub prapa resh!
Folmë,
Çkërkon prej meje, kobëtar?
I mbështjelluri vetëtimash, i panjohur,
Fol! Çkërkon,
O i panjohuri - Zot?-
Si? Shpërblim?
Çkërkon si shpërblim?
Të kërkoje shumë, do të këshilloja krenarinë!
Të më flisje prerë dhe shkurtas -
Do të këshilloja përsëri krenarinë tjetër!
Ha, ha!
Më dashke mua? Mua?
Mua të tërin?
Dhe më mundon, sa i marrë që je,
Ma mundon krenarinë?
Kush më fal dashuri, kush më ngroh?
Kush më do? Jepmi duart e ngrohta,
Jepma zjarrin e zemrës,
Jepmë mua, më të vetmuarit,
Akullin, ah! Shtatë herë akullin,
Pranë armiqve që më mësojnë të vuaj,
Jepmë akullin, po të jepem,
Armik mizor,
Vetëm ty!
U zhduke?!
Më ike,
Shoku i fundit dhe i vetmi,
Armiku i madh,
I panjohuri im,
Zoti im xhelat!
Jo! Eja përsëri,
Me të gjitha mundimet e tua!
Tek i fundit nga të gjithë të vetmuarit,
Eja përsëri!
Të gjithë rrëketë e lotëve
Më derdhen në rrjedhën tënde!
Flaka e fundit e zemrës
Flakëron për ty!
Eja përsëri,
Zot i panjohur, dhimbja ime, gëzimi im i fundit!-
Në ajrin e përndritur,
Kur vesa ngushëllimtare
Bie në tokë,
E paparë, e padëgjuar
Me këpucë të hijshme e të lehta.
Si të gjithë ngushëllimet e ëmbla,
A të kujtohet, të kujtohet, zemër e zjarrtë,
Si dikur digjeshe nga etja
Për lotë hyjnorë, për vesë ngushëllimtare,
E etur, e lodhur, e zhuritur,
Teksa në shtigjet me bar të zverdhur,
Rrezet keqdashëse të diellit që perëndonte,
Të ndiqnin përqark drurëve të errët,
Rrezet përvëlimtare, verbimtare, dashakeqëse?
Dashnor i së vërtetës? ti? - Kështu të tallnin -
Jo! Vetëm një poet!
Një bishë dinake, grabitqare, tinëzare,
Që duhet të gënjejë,
Që duhet të gënjejë me vetëdije dhe me dashje,
Dhe të dëshirojë prenë,
Me ngjyrime larve.
Dhe vetë larvë,
Dhe vetë pre!
Ky dashnor i së vërtetës?
Jo! Vetëm një i marrë! Vetëm një poet!
Duke folur vetëm për ngjyrat!
Duke bërtitur nga larva laramane e çmendurisë,
Vërtitet në urën e fjalëve rrenacake,
Ndër qiejsh të rremë,
Duke ardhur përqark vërdallë!
Vetëm një i marrë, vetëm një poet!
Ky dashnor i së vërtetës?
Jo, përfytyrim
I heshtur, i ngrirë, i lëmuar, i ftohtë,
Dhe as shtatore hyjnore
E vendosur para tempujve
Në roje të pragut të shenjtë.
Jo! Armik i shtatoreve të virtytit,
Më e afërt sesa shkretia e pragut të një tempulli.
Me guxim prej maceje
Hidhet nga çdo dritare,
Në çdo çast,
Duke nuhatur me dëshirë dhe pasion,
Vrapon nëpër pyjet e virgjër,
Në mes bishave me lëkurë lara-lara.
I shëndetshëm, plot ngjyrë, i bukur si mëkati,
Me buzët dëshirake,
Hyjnisht tallëse, hyjnisht skëterrore,
Hyjnisht të etura për gjak,
Sulet për grabitje, genjështar dhe tinëzar;
Apo si shqiponja
Që nga larg vëzhgon greminën,
Greminën e vet.
Ah, si ulet
Poshtë e më poshtë,
Thellë e më thellë,
Dhe pastaj, duke mbledhur flatrat,
Lëshohet si plumb
Mbi qengjin,
Armike e shpirtrave të butë si qengji,
Duke urryer të gjithë ata që e vështrojnë
Me vështrim prej deleje, ata që e kanë lëkurën
Të butë si të sajën, dhe butësi qengji!
Kështu,
Si shqiponja e si pantera
Janë dëshirat e poetit.
Dëshirat e tua, mes mijëra maskash,
O i marrë, o poet!
Ti që pe njeriun,
Ashtu si Zoti qengjin,
Për të zhbimë Zotin nga njeriu,
Dhe butësinë prej qengji nga shpirti,
Qeshje gjatë zhbimjes,-
(Kjo, kjo është lumturia jote!
Lumturi shqiponje dhe pantere,
Lumturi poeti dhe të marri!).
Në ajrin e përndritur,
Kur drapri i hënës,
Armik i ditës,
I blertë mes kuqëlimit të purpurtë,
Futet vjedhurazi lakmitar,
Duke rrëshqitur në çdo çap,
Tinëzar në kaçubet e trëndafilave,
Gjersa ato këputen e molisen
Të zbehta nëpër natë.
Kështu molisesh njëherë,
Prej çmendurisë të së vërtetës,
Prej gëzimeve të ditëve
I lodhur, dhe i sëmurë nga drita,
I këputur nga mbrëmjet dhe hijet.
Për të vërtetën.
I djegur dhe i etur.
Të kujtohet, të kujtohet, zemër e zjarrtë,
Si lëngoje nga etja?
Si i djegur jam
Për të vërtetat,
Si i marrë,
Si poet!
pershendetje
__________________
Poets were the first teachers of mankind. Horace
Denonco kėtė mesazh tek moderatorėt | IP: e regjistruar
|